Dals "Allgäuer Spätzle" sur ils "Schlutzkrapfen" fin al "Zelten" porscha la cuminanza da lavur da las regiuns alpinas ARGE ALP ussa en l'internet in viadi culinaric tras ils pajais da las Alps. Recepts ed ulteriuras infurmaziuns davart la varietad culinarica surregiunala chattan ins sin la pagina d'internet.

Tgi che vul savair dapli da las tratgas tipicas ord la regiun alpina ed eventualmain er cuschinar quellas, è a la dretga adressa sin la nova pagina d'internet da l'ARGE ALP . Sut http://www.argealp.org/projekte/argealp-kochbuch sa chatta online in cudesch da cuschinar che porscha per mintga nas fin recepts adattads che vegnan cuschinads cun ils products tipics da la regiun alpina correspundenta. Perfin vins vegnan recumandads. Plinavant pon ins s'infurmar sur da chaussas nizzaivlas davart la varietad culinarica en ils pajais da las Alps che furma er ina part impurtanta da la cultura.

Il Grischun è represchentà cun tratgas indigenas che vegnan cuschinadas cun spezialitads tipicas grischunas. Ultra da quai vegn descrit il context istoric da las tratgas, sco per exempel dals maluns, dals capuns, dals pizzocheri u da la schuppa da giutta.

Ils recepts èn disponibels per tudestg e per talian. Il cudesch tudestg "Kulinarische Köstlichkeiten ohne Grenzen – Traditionelle landwirtschaftliche Produkte aus den Arge Alp Ländern", ch'è vegnì creà il 1999, pon ins medemamain clamar si.

L'ARGE ALP cumpiglia las regiuns, ils chantuns ed ils pajais federativs Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg. Sco emprima cuminanza transcunfinala da regiuns ha l'ARGE ALP fullà via per ina nova conscienza da las regiuns en l'Europa. Las commembras ed ils commembers s'engaschan per in svilup durabel da lur patria alpina dapi che l'organisaziun è vegnida fundada l'onn 1972. Il presidi mida annualmain. Actualmain presidiescha il Tirol dal Sid l'ARGE ALP.


Gremi: chanzlia chantunala dal Grischun
Funtauna: rg cuminanza da lavur da las regiuns alpinas