Il secretariat da la conferenza da las regenzas chantunalas (CdC) ha realisà sia dieta en clausura da cader da quest onn ils 25/26 da mars 2010 a Breil ed a Cuira. Ultra da la planisaziun da la gestiun da la CdC e da dumondas davart il svilup dal secretariat è stà sin il program in barat d'ideas cun il cusseglier guvernativ Martin Schmid e cun il chancelier Claudio Riesen.
Mintg'onn realiseschan la secretaria generala sco er las manadras ed ils manaders da partiziun da la CdC ina dieta en clausura che dura dus dis. Questas dietas en clausura da cader servan a planisar ils temas centrals da la politica interna e da la politica da l'exteriur da la CdC sco er a tractar dumondas davart l'organisaziun dal secretariat da la CdC en la chasa dals chantuns a Berna.
Per tgirar ils contacts cun las regenzas chantunalas han lieu questas dietas en clausura da cader da la CdC mintg'onn en in auter chantun. L'elecziun dal chantun Grischun per la dieta en clausura da quest onn n'è betg stada casuala: Sandra Maissen ch'è dapi 10 mais la nova secretaria generala da la CdC ha dà grond pais da realisar sia emprima dieta en clausura en ses chantun d'origin.
Il chantun Grischun represchenta la Svizra rumantscha en la CdC
Sin il program figurava in inscunter cun il cusseglier guvernativ Martin Schmid, commember da la giunta directiva da la CdC, sco er cun il chancelier Claudio Riesen e cun ulteriuras commembras e cun ulteriurs commembers da l'administraziun grischuna. A questa chaschun han pudì vegnir scleridas dumondas actualas da la collavuraziun tranter il chantun Grischun e la CdC.
La Svizra rumantscha ha il dretg d'avair in mandat permanent en la giunta directiva da la CdC che prepara las fatschentas politicas per mauns da las regenzas chantunalas. Dapi che la CdC è vegnida fundada l'onn 1993 presta il chantun Grischun tras quai ina contribuziun preziusa per la collavuraziun federala .
Ulteriuras infurmaziuns dat:
dr. Sandra Maissen, secretaria generala da la CdC, tel. 079 507 01 77
Gremi: secretariat da la conferenza da las regenzas chantunalas
Funtauna: rg secretariat da la conferenza da las regenzas chantunalas
Dieta annuala en clausura dal secretariat da la CdC en il Grischun: cusseglier guvernativ Martin Schmid, Sandra Maissen, secretaria generala da la CdC , e chancelier Claudio Riesen (da sanestra) a Breil.