Navigation

Inhaltsbereich

  • Erste Mitteilung
  • Neuen Beitrag einfügen
Il Grischun è il chantun envidà a la bursa svizra da spectaculs a Thun. L'occurrenza da success vegn realisada per la 51avla giada e dura dals 28 d'avrigl fin ils 2 da matg 2010.

La bursa da spectaculs da l'atp (associaziun artists – teaters – promoziun) che ha lieu regularmain mintg'onn è sa sviluppada ils ultims onns ad in'occurrenza appreziada entaifer la scena naziunala ed internaziunala da l'art pitschen. La bursa da spectaculs è – sco il num di gia – ina bursa, pia ina plazza da martgà. Ella è dentant er in inscunter per artistas e per artists da l'art teatral da l'entir mund ed in festival per promover il barat cultural. Tranter las visitadras ed ils visitaders sa chattan tant persunas che s'interesseschan per l'art e plinavant persunas dal fatg sco organisaturas ed organisaturs d'occurrenzas culturalas u represchentantas e represchentants d'agenturas.

KleinKunstSpecial "chantun envidà: il Grischun"
La bursa da spectaculs vegn enritgida da differentas occurrenzas accumpagnantas, ils uschenumnads KleinKunstSpecials. Uschia per exempel cun il KleinKunstSpecial da quest onn "chantun envidà: il Grischun". Ina giuria d'expertas e d'experts ha fatg ina selecziun d'artistas e d'artists grischuns che resplenda dad ina vart la diversitad da noss chantun e che garantescha da l'autra vart in program da scena divertent da gronda qualitad. Saja quai per tudestg, per talian u per rumantsch, da preschentaziuns musicalas, vocalas u cabarettisticas fin al teater ed al teater da figuras: ins po vesair tut quai che la scena grischuna d'art pitschen ha da porscher! Da venderdi, ils 30 d'avrigl, fin sonda, il 1. da matg 2010, han las artistas ed ils artists la pussaivladad da procurar cun lur spectaculs per in punct culminant durant dus dis en la citad interna da Thun.

Las suandantas artistas ed ils suandants artists represchentan il chantun Grischun:
Acavoce, Coirason, Corin Curschellas, Justina Derungs & Curdin Janett, Kurt Grünenfelder, Trio Schilter, Annina Sedláček, Manuela Tuena.

A la bursa da spectaculs sa preschenta il chantun Grischun envidà er culinaricamain da sia meglra vart. Durant ils spectaculs da las artistas e dals artists grischuns datti sper la tribuna er dus stans da martgà cun products alpins grischuns da las partenarias e dals partenaris d'alpinavera.

Ulteriuras infurmaziuns
Descripziuns detagliadas davart las artistas e davart ils artists che vegnan a sa preschentar cun lur programs a Thun chattais Vus en il flyer (datoteca da pdf).


Infurmaziuns:
Armon Fontana, promoziun da la cultura dal Grischun, Loëstrasse 26, 7001 Cuira, tel. 081 254 16 02, e-mail: armon.fontana@afk.gr.ch  


Gremi: uffizi da cultura
Funtauna: rg uffizi da cultura
Neuer Artikel