Navigaziun principala

Cuntegn da la pagina

Dapli moviment en il mintgadi da scola fa daventar inschignus, ferm ed intelligent

  • Erste Mitteilung
  • Neuen Beitrag einfügen
"Scola en moviment en il Grischun" dat bler spazi al moviment, al gieu ed al sport en il mintgadi da scola. Uschia vegnan promovids activamain la sanadad, il svilup corporal e spiertal sco er la confidenza dals uffants en sasez. En collavuraziun cun l'acziun naziunala "scola en moviment" e cun Gian Simmen lantscha la scola primara da Grüsch ils 7 da matg 2010 la promoziun dal moviment cun cleras finamiras.

Uffants e giuvenils dovran in conturn, nua ch'els pon sa mover bler e siglir enturn. Medemamain basegnan els pasts variads ch'els mangian ensemen cun la famiglia u cun autras persunas da confidenza. Il program "grischun en moviment" che vegn purtà da l'uffizi da sanadad dal Grischun, en collavuraziun cun l'uffizi per la scola populara ed il sport, cun il center per prevenziun e promoziun da la sanadad ZEPRA sco er cun la promoziun da la sanadad Svizra, gida a promover in ambient correspundent. Ensemen cun vischnancas, cun scolinas, cun scolas e cun persunas spezialisadas vegnan realisads projects che megliereschan las cundiziuns da basa per in pais saun. "Scola en moviment en il Grischun" è in tal project.

Las 55 "scolas en moviment" dal Grischun èn s'obligadas per 3 onns da project. Las persunas d'instrucziun vegnan sustegnidas cun furmaziuns supplementaras, cun agids concrets per la realisaziun e cun ina contribuziun finanziala. Las scolaras ed ils scolars profiteschan ch'i vegn dada ina valur impurtanta al moviment, al gieu ed al sport, tant en las pausas sco er en l'instrucziun. D'ina vart vegn rinforzada uschia la confidenza dals uffants en sasez e da l'autra vart promovan pausas cun moviment la capacitad da sa concentrar durant las uras da teoria. E betg sco ultim presta ina scola che promova il moviment ina contribuziun impurtanta per la sanadad e per la qualitad da la scola.

Collavuraziun cun "scola en moviment" (uffizi federal da sport)
Gia in terz da las scolaras e dals scolars dal Grischun po profitar dal project "scola en moviment en il Grischun". En vista al fatg che gia mintga 7avel uffant è memia gross e quai ina buna situaziun da partenza. Il Grischun profitescha ultra da quai da la collavuraziun cun l'acziun da success "scola en moviment" da l'uffizi federal da sport. A l'acziun ch'è vegnida lantschada l'onn 2005 e che vegn sustegnida da Rivella sa participeschan mintg'onn circa 60'000 scolaras e scolars en Svizra.
In punct culminant da "scola en moviment" è la visita d'ina sportista u d'in sportist renumà da la Svizra. Gian Simmen visita ils 7 da matg 2010 da las 08.00 fin a las 12.00 las scolaras ed ils scolars da la scola primara da Grüsch. L'enconuschent snowboarder e victur olimpic da Nagano vegn ad empruvar novas furmas da moviment cun ils uffants. Questa visita vegn duvrada per inaugurar uffizialmain la scola sco "scola en moviment".

Ulteriuras infurmaziuns:
www.graubuenden-bewegt.ch /rumantsch/Projects/Scola en moviment e www.schulebewegt.ch  


Infurmaziuns:
Denise Rudin, manadra dal project "grischun en moviment", uffizi da sanadad dal Grischun, tel. 081 257 25 17


Infurmaziun per las medias:
Las collavuraturas ed ils collavuraturs da las medias che vulan rapportar davart l'occurrenza cun Gian Simmen èn envidads cordialmain. L'occurrenza ha lieu venderdi, ils 7 da matg 2010, da las 8.00 fin a las 12.00 en la scola primara da Grüsch. I vegn supplitgà da drizzar las annunzias fin mesemna, ils 5 da matg 2010, a Denise Rudin (tel. 081 257 25 17; e-mail: Denise.Rudin@san.gr.ch).


Gremi: uffizi da sanadad
Funtauna: rg uffizi da sanadad
Neuer Artikel