Cuntegn da la pagina

Tschiervs traversan la Val dal Rain

  • Erste Mitteilung
  • Neuen Beitrag einfügen
L'enviern precedent èn tschiervs vegnids martgads e munids cun emetturs en il territori dal Rätikon. Quai è succedì en il rom d'in project communabel dal Vorarlberg, dal principadi da Liechtenstein e dal chantun Grischun. Gia ils emprims resultads d'observaziun èn surprendents.

Uschia traversan dus da trais tschiervs, ch'ins ha munì cun emetturs sin il Luzisteig, la Val dal Rain a Ragaz Bogn. Els sa chattan actualmain en la Val Tamina, nua ch'els cuntinueschan lur viadi en direcziun d'in quartier da stad. En tge lieu ch'ils animals han traversà la Val – saja quai en la vischinanza da las punts dal Rain da la A13 e da las Viafiers federalas u en il nord da Ragaz Bogn sur ina punt da vias champestras – n'è betg definitivamain cler. Quai duai vegnir sclerì pli detagliadamain il proxim atun.

Ils ulteriurs animals, ch'èn vegnids martgads a Seewis, a Fanas ed a Saas, sa chattan medemamain dapi in pèr dis sin viadi en direcziun dals quartiers da stad. Grazia al project transcunfinal communabel èn da spetgar ulteriuras invistas interessantas dal cumportament da viadi dals tschiervs. Cunquai che betg tut ils tschiervs n'èn munids cun emetturs, vegn la populaziun supplitgada d'annunziar a l'uffizi da chatscha e pestga dal Grischun eventualas observaziuns da tschiervs cun cularins.


Infurmaziuns:
- dr. Georg Brosi, uffizi da chatscha e pestga, tel. 081 257 38 92
- Hannes Jenny, biolog da selvaschina, uffizi da chatscha e pestga, tel. 081 257 38 92


Gremi: uffizi da chatscha e pestga
Funtauna: rg uffizi da chatscha e pestga
Neuer Artikel