Navigation

Inhaltsbereich

  • Erste Mitteilung
  • Neuen Beitrag einfügen
En collavuraziun cun la cuminanza da lavur da las regiuns alpinas (ARGE ALP) vegnan preschentads quest onn al festival da films da muntogna "Abenteuer Berg – Abenteuer Film" da Salzburg in'exposiziun da fotografias, contribuziuns da film e referats alpinistics.

La cuminanza da lavur da las regiuns alpinas (ARGE ALP) cooperescha il november/december 2010 cun il renumà festival da films da muntogna "Abenteuer Berg – Abenteuer Film" da Salzburg. La cooperaziun cuntegna d'ina vart l'installaziun d'ina exposiziun da fotografias davart il tema "Cuntradas da cultura purilas en il territori alpin" e da l'autra vart er ina contribuziun da films cun il tema general "Vita e secturs da la vita en las regiuns alpinas dals pajais commembers". Plinavant datti referats davart trais regiuns spezialas da l'ARGE ALP: d'in maun davart il viandar e davart l'ir en muntogna en il territori alpin da l'ost, da l'auter maun davart las sendas da fier en la Brenta (Dolomitas) respectivamain davart l'ir en muntogna en las Alps dal vest.

L'ARGE ALP tschertga ussa films e fotografias d'amaturas e d'amaturs davart ils temas numnads. En il Grischun pon ils films davart il tema "Vita e secturs da la vita en las regiuns alpinas dals pajais commembers" vegnir tramess fin la fin da matg 2010 al servetsch da medias da la chanzlia chantunala (Reichsgasse 35, 7001 Cuira; e­mail florian.joerg@staka.gr.ch). Il termin per inoltrar fotografias per l'exposiziun da fotografias davart il tema "Cuntradas da cultura purilas en il territori alpin" dura fin la fin da fanadur 2010. Las fotografias ed ils films che vegnan inoltrads en il Grischun vegnan tramess vinavant al stadi federativ Salzburg che fa la selecziun finala ensemen cun l'organisatur dal festival da films da muntogna.

Las fotografas e cineastas amaturas sco er ils fotografs e cineasts amaturs vegnan envidads ad in segiurn a Salzburg ed a la preschentaziun dal 17avel festival da films da muntogna.

Il festival da films da muntogna da Salzburg ha ina impurtanza fitg gronda entaifer ils circuls spezialisads ed è enconuschent e renconuschì lunsch sur il territori austriac ora. Tranter auter exista er dapi plirs onns ina stretga cooperaziun cun la provinza da Trento.


Infurmaziuns:
dr. Roland Floimair, Landespressebüro Salzburg, tel. 0043 662 8042 2365, e­mail: landespressebuero@salzburg.gv.at  


Gremi: ARGE ALP
Funtauna: rg ARGE ALP
Neuer Artikel