Zum Seiteninhalt

Elecziuns cirquitalas ed elecziuns da la regenza dals 13 da zercladur 2010 – preavis

  • Erste Mitteilung
  • Neuen Beitrag einfügen

Dumengia, ils 13 da zercladur 2010, han lieu las elecziuns cirquitalas e las elecziuns da la regenza en il chantun Grischun. Ils resultats vegnan actualisads cuntinuadamain sin la pagina d'internet www.gr.ch durant la dumengia d'elecziun.

Dumengia, ils 13 da zercladur 2010, a chaschun da las elecziuns cirquitalas vegnan las votantas ed ils votants dal Grischun ad occupar da nov ils suandants mandats:

  • presidenta cirquitala resp. president cirquital
  • substitutas e substituts da la presidenta cirquitala resp. dal president cirquital
  • commembras e commembers dal cussegl grond (parlament chantunal)
  • suppleantas e suppleants dal cussegl grond

Las elecziuns dal cussegl grond valan per la perioda d'uffizi dal 1. d'avust 2010 fin ils 31 da fanadur 2014. Da la repartiziun actuala dals mandats dal cussegl grond sin ils singuls circuls pon ins prender invista qua en l'internet.

La chanzlia chantunala publitgescha la dumengia suentermezdi ils resultats da las elecziuns dals singuls circuls. Sin www.gr.ch vegnan enumerads ils resultats da tut ils circuls. Circuls, dals quals ils resultats èn avant maun, survegnan en l'internet in document da pdf che cuntegna ils nums da las candidatas e dals candidats elegids e che po vegnir chargià giu.

Dumengia, ils 13 da zercladur 2010, han lieu ensemen cun las elecziuns cirquitalas er las elecziuns da la regenza per la perioda d'uffizi dal 1. da schaner 2011 fin ils 31 da december 2014.

La chanzlia chantunala publitgescha la dumengia suentermezdi ils resultats da las vischnancas tar las elecziuns da la regenza. Sin www.gr.ch vegnan a figurar a partir da las 12.00 ils resultats intermediars che vegnan a vegnir actualisads mintga ura, fin ch'ils resultats finals èn avant maun.

In eventual segund scrutini per las elecziuns cirquitalas e per las elecziuns da la regenza è previs per dumengia, ils 4 da fanadur 2010. La chanzlia chantunala fa attent a las votantas ed als votants ch'i sto vegnir resguardà il suandant per emplenir il cedel electoral:

1. Cedels electorals n'èn betg valaivels, sche:
a) els n'èn betg uffizials;
b) els èn emplenids or auter che a maun;
c) els cuntegnan remartgas ingiuriusas u caracterisaziuns evidentas;
d) els cuntegnan "quel(s) u quella(s) fin ussa" u chaussas sumegliantas.

2. Sco vuschs nunvalaivlas da candidatas e da candidats vegnan stritgads:
a) ils nums da persunas che na pon betg vegnir elegidas u che na pon betg pli vegnir reelegidas;
b) las repetiziuns da nums da candidatas e da candidats ch'il medem cedel electoral cuntegna gia ina giada (cumulaziun);
c) ils nums ch'èn scrits en moda illegibla;
d) ils nums da persunas che n'èn betg designadas cleramain;
e) nums ch'èn da memia (da sut ensi).


Gremi: chanzlia chantunala dal Grischun
Funtauna: rg chanzlia chantunala dal Grischun

Neuer Artikel