En sia ultima sesida ha la regenza grischuna tractà differentas fatschentas da vischnancas e da regiuns sco er deliberà contribuziuns chantunalas ad instituziuns.
Da vischnancas e da regiuns
- Claustra-Serneus: La regenza ha approvà la revisiun parziala da la planisaziun locala da la vischnanca da Claustra-Serneus dals 21 da zercladur 2009 concernent il "project consecutiv da l'aua gronda 2005 da la Landquart e dals auals laterals" sco er ils projects d'exposiziun ch'èn colliads cun quai. I vegnan concedidas contribuziuns chantunalas da totalmain 3'666'600 francs als custs per las construcziuns planisadas da la Landquart, dal dutg da Schlappin sco er d'ulteriurs dutgs.
- Stierva: La regenza garantescha a la vischnanca da Stierva ina contribuziun da 352'800 francs per renovar il provediment d'aua cun integrar in'ovra electrica pitschna.
- Churwalden: A la vischnanca da Churwalden vegn garantida ina contribuziun da 41'000 francs per construir il sutpassadi Müli a Malix.
- Flem: La revisiun parziala da la planisaziun locala "plan d'areal Waldeck" da la vischnanca da Flem, concludida ils 12 da schaner 2010, vegn approvada.
- Sta. Maria i.C. La revisiun parziala da la planisaziun locala da la vischnanca da Sta. Maria i.C., concludida ils 23 d'avrigl 2008, vegn approvada.
Contribuziuns chantunalas a differentas instituziuns
- Chasa da persunas attempadas e da tgira Däscher a Zizers: A la chasa da persunas attempadas e da tgira Däscher a Zizers vegn garantida – cun resalva da la garanzia da la finanziaziun restanta – ina contribuziun chantunala d'investiziun da totalmain 1'120'000 francs al project per metter a disposiziun set ulteriurs letgs da tgira.
Projects da vias
La regenza ha approvà totalmain 1'330'000 francs per construir e per sanar il suandant traject da via:
- via dal Flüela: lavurs d'impressari e da cuvrida, Plan Grond – God Champatsch
Gremi: regenza
Funtauna: rg chanzlia chantunala dal Grischun