Navigaziun principala

Cuntegn da la pagina

Posiziun dal departament da giustia, segirezza e sanadad

  • Erste Mitteilung
  • Neuen Beitrag einfügen
En il Tagesanzeiger dals 17 da matg 2010, èsi vegnì pretendì sut il titel "Bündner Polizeikommandant deckte koksenden Polizisten" ch'i sajan vegnidas consumadas drogas en il corps da polizia grischun e ch'i haja regnà in clima da favurisaziun.

En connex cun il rapport en il Tagesanzeiger resultan las suandantas remartgas:

1. Sch'in commember dal corps da polizia grischun vegn confruntà cun la reproscha d'avair commess in surpassament dal dretg penal, cloma la polizia chantunala mintgamai la procura publica per laschar sclerir questas reproschas. La procura publica fa alura ils scleriments necessaris e decida davart l'ulteriur proceder.

Sch'ina polizista fallibla u in polizist fallibel vegn sentenzià penalmain, resultan da quai er mesiras disciplinaras dal dretg da persunal.

Tenor noss scleriments è vegnida clamada la procura publica per examinar ils fatgs presumtivs ch'èn probablamain capitads ils onns 1996 e 2006. Per dar eventualas ulteriuras infurmaziuns è cumpetenta la procura publica.

2. Las renfatschas cunter il cumandant da polizia defunct dr. Markus Reinhardt èn vegnidas examinadas detagliadamain da la cumissiun da gestiun (CdG) e, sch'ellas èn sa verifitgadas, tractadas en il rapport. La regenza grischuna n'ha nagin motiv da s'exprimer anc pli detagliadamain en chaussa.

3. Sch'il chantun sa separa d'ina collavuratura u d'in collavuratur, na prenda el – pervia da motivs da la protecziun da la persunalitad – nagina posiziun en chaussa.

4. La plazza dal cumandant da polizia n'è l'emprim betg vegnida publitgada pervia da motivs da pietad. La regenza ha er anc spetgà il rapport da la CdG per pudair resguardar eventualas recumandaziuns. En il fratemp è il profil d'exigenzas vegnì surlavurà. Ils proxims dis vegn quel preschentà a la regenza, per che la plazza vacanta possia vegnir publitgada svelt. Dal rest è la direcziun da la polizia chantunala stada garantida a partir da l'emprima ura.

5. Las renfatschas al cumandant da polizia interimistic che la polizia chantunala n'haja praticamain nagina direcziun èn nunfundadas e deplazzadas.


Tar questa posiziun na vegnan dadas naginas ulteriuras infurmaziuns u intervistas individualas.


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel