Il chantun Grischun augmenta il dumber d'asils da selvaschina d'actualmain 373 a totalmain 411. Quai ha la regenza grischuna concludì a chaschun da sia ultima sesida. Ultra da quai ha la regenza decidì da manar tras il project "manaschament da cas tras la furmaziun professiunala dal Grischun" sco emprova fin l'onn 2014. Uschia survegnan giuvenils che han difficultads da s'integrar en il martgà professiunal ed en il martgà da lavur in sustegn professiunal. La finala ha la regenza tractà la consultaziun tar la revisiun parziala da la lescha federala davart la protecziun da la populaziun e la protecziun civila.

Il Grischun survegn dapli asils da selvaschina
Il chantun Grischun augmenta il dumber d'asils da selvaschina. Quai ha concludì la regenza grischuna, approvond las disposiziuns correspundentas. Ils asils da selvaschina gidan ad auzar localmain effectivs da selvaschina debels, a meglierar la structura natirala dals effectivs sco er a proteger spezias da selvaschina periclitadas cunter ils disturbis da la chatscha.
En il rom da la nova regulaziun concludida è il dumber d'asils da selvaschina generals vegnì augmentà da 193 a 215, il dumber d'asils da chatscha auta dad 8 a 19 ed il dumber d'asils da chatscha bassa da 38 a 44. Tar las autras categorias d'asils èn vegnids determinads sco fin ussa 1 asil da chavriels e 20 asils da muntanellas. Il dumber d'asils da lieurs è vegnì reducì per 3 a 54. Il dumber d'asils d'utschleglia da chatscha sco er d'utschleglia da chatscha da l'aua è vegnì augmentà mintgamai per 1 a 20 respectivamain a 38. En tut vegn il dumber d'asils da selvaschina chantunals augmentà d'actualmain 373 a 411. La surfatscha totala s'engrondescha dentant mo per pauc da 736 a 755 kilometers quadrat. Ensemen cun il parc naziunal svizzer e cun ils 6 asils da selvaschina federals resulta en il chantun ina surfatscha totala d'asils da selvaschina da 1131 kilometers quadrat.
Ils asils da selvaschina èn instruments impurtants per la planisaziun da la chatscha. Els èn indispensabels per il mantegniment dals effectivs da selvaschina, perquai ch'els protegian la selvaschina en spazis da viver impurtants cunter ils disturbis da la chatscha. Els servan dentant er a mantegnair ina structura natirala dals effectivs. Per determinar ils asils da selvaschina ston dentant vegnir observads differents princips che han da valair en general. Per cuntanscher ina buna repartiziun da la selvaschina na ston betg vegnir zavrads gronds asils da selvaschina, mabain numerus asils pitschens. Asils da selvaschina memia gronds chaschunan numnadamain accumulaziuns da selvaschina nungiavischadas. Tenor l'avis da la regenza è quest proceder sa cumprovà fin ussa, uschia che quests princips vegnan resguardads er en il rom da la reordinaziun actuala dals asils da selvaschina.

Il manaschament da cas tras la furmaziun professiunala dal Grischun vegn lantschà sco emprova
Il chantun Grischun vul manar tras il project "manaschament da cas" sco emprova fin l'onn 2014. Quai ha concludì la regenza grischuna. Ella ha prendì enconuschientscha dal concept correspundent ed ha incumbensà l'uffizi per la furmaziun professiunala cun la realisaziun. Uschia survegnan giuvenils che han difficultads da s'integrar en il martgà professiunal ed en il martgà da lavur in sustegn professiunal.
Gia dapi il schaner 2008 stat a disposiziun en il chantun Grischun – sco emprova – in coaching renconuschì da la confederaziun. L'emprim onn èn sa participads totalmain 114 giuvenils a questa mesira. Per var 50 pertschient dad els ha pudì vegnir chattada ina plazza d'emprendissadi cun attestat federal da qualificaziun u cun attest federal da furmaziun professiunala. Per ulteriurs var 25 pertschient è vegnida chattada ina soluziun intermediara che serva sco mesira preparatorica per entrar pli tard en ina furmaziun fundamentala professiunala. La finamira da las stentas currentas e planisadas è quella da pussibilitar ad uschè blers giuvenils sco pussaivel da terminar in'emprima scolaziun obligatorica e da reducir respectivamain d'impedir uschia la dischoccupaziun da giuvenils.
Sco cumplettaziun dal coaching current duai ussa vegnir creà tar l'uffizi per la furmaziun professiunala in post da coordinaziun per il manaschament da cas. Quest post duai entretschar en l'avegnir meglier las differentas acturas ed ils differents acturs ch'èn activs en quest sectur. Ils custs totals per il project ch'è vegnì permess ussa fin l'onn 2014 importan 750'000 francs. La confederaziun vegn probablamain a sa participar considerablamain a quest project.

La regenza refusa la revisiun parziala da la lescha federala davart la protecziun da la populaziun e la protecziun civila
La regenza grischuna na va betg d'accord cun la versiun preschentada dal sboz per ina revisiun parziala da la lescha federala davart la protecziun da la populaziun e la protecziun civila. Tar il project na sa tracti betg d'ina refurma fundamentala dal sistem da cooperaziun "protecziun da la populaziun", mabain d'optimaziuns en singuls secturs. Las midadas proponidas concernan en spezial l'instrucziun en la protecziun civila sco er las regulaziuns davart las ovras da protecziun.
Sco che la regenza scriva en sia resposta da consultaziun, saja la mancanza essenziala dal project quella, che las incumbensas e las cumpetenzas da la confederaziun e dals chantuns sco er las obligaziuns da la populaziun na vegnian betg determinadas en la lescha. Empè da quai saja previs ch'il cussegl federal reglia questas dumondas sin il stgalim da l'ordinaziun. Sin basa dal sboz da la lescha na possian ils chantuns perquai betg prevair, cun tge prescripziuns e cun tge consequenzas finanzialas e persunalas ch'els stoppian far quint, crititgescha la regenza. Ella è da l'avis che questas disposiziuns stoppian vegnir regladas stringentamain sin il stgalim da la lescha.

Da vischnancas e da regiuns

• Vrin: A la vischnanca da Vrin vegn garantida e deliberada ina contribuziun da 224'640.– francs per sanar e per engrondir il stabiliment dal provediment d'aua da Cons e da Vrin Vitg / Vrin Dado, 2. etappa.
• Masagn: La revisiun totala da la planisaziun locala, concludida da la vischnanca da Masagn ils 20 da november 2009, vegn approvada.
• Tusaun: La revisiun parziala da la planisaziun locala da la vischnanca da Tusaun dals 8 da november 2009 vegn approvada.
• Zuoz: La revisiun parziala da la planisaziun locala, concludida da la vischnanca da Zuoz ils 10 da favrer 2010, vegn approvada.

Contribuziuns chantunalas a differentas instituziuns

• Chasa da persunas attempadas e da tgira Serata a Zizers: Il project da construcziun per sanar e per engrondir la chasa da persunas attempadas e da tgira Serata a Zizers vegn approvà. A l'instituziun responsabla vegn garantida ina contribuziun chantunala da maximalmain 5'800'000 francs per l'entir project da construcziun cun 45 letgs da tgira renconuschids.

Projects da vias
La regenza ha approvà totalmain 1'960'000 francs per construir e per sanar ils suandants trajects da vias:
- via dal Güglia: projectaziun dal tunnel dal sviament da Silvaplauna
- via da la Mantogna dadens: lavurs da cuvrida, spartavias Bruneir – Glaspass


Gremi: regenza
Funtauna: rg chanzlia chantunala dal Grischun