Cuntegn da la pagina

Communicaziun da la regenza dals 3 da zercladur 2010

  • Erste Mitteilung
  • Neuen Beitrag einfügen

A chaschun da sia ultima sesida ha la regenza grischuna approvà il project d'exposiziun per manar natiers aua en il Lag la Cauma. Ultra da quai ha ella tractà differentas fatschentas da vischnancas e da regiuns sco er concedì contribuziuns chantunalas a differentas instituziuns.

Glisch verda al project per manar natiers aua en il Lag la Cauma
Il project dal chantun che ha l'intent da manar natiers aua en il Lag la Cauma a Flem po vegnir realisà. La regenza grischuna ha approvà il project d'exposiziun correspundent.
Il project prevesa da prender aua da l'aual Platt Alva e per part er da l'aual Flem durant sis fin otg emnas per onn e da manar natiers questa aua a l'aual Pulté che furnescha indirectamain sia aua al Lag la Cauma. Per far in'expertisa dal project e da ses effects è vegnì consultà in expert independent; sias recumandaziuns vegnan ussa resguardadas. En consequenza da quai han las organisaziuns per la protecziun da l'ambient retratg lur protesta.
Las recumandaziuns da l'expert vegnan ussa integradas sco cundiziuns en il conclus d'approvaziun da la regenza. Uschia ston l'emprim vegnir analisadas eventualas funtaunas da substanzas nutritivas (fosfat) en l'intschess dals auals Platt Alva e Flem. Qua tras duai vegnir garantida a lunga vista la qualitad da l'aua dal Lag la Cauma. L'inducziun da l'aua che vegn manada natiers vegn plinavant concepida uschia, ch'i po vegnir reagì immediatamain sin eventualas midadas da la qualitad da l'aua. Per quest intent vegnan observads cuntinuadamain en spezial er il turblament e la temperatura dal Lag la Cauma.
L'october 2002 era vegnida tagliada ina sfendaglia da carst a l'intern dal tunnel da sviament da Flem en il rom da las lavurs da construcziun vi da quest tunnel. Silsuenter han ins stuì constatar che l'afflussiun sutterrana da l'aua en il Lag la Cauma sco er en autras auas è sa reducida.

Da vischnancas e da regiuns

  • Brusio: Per la sanaziun e per l'engrondiment da la serenera Li Geri garantescha la regenza a la vischnanca da Brusio ina contribuziun da maximalmain 116'620 francs.
  • Morissen: A la vischnanca da Morissen vegn garantida e deliberada ina contribuziun da 69'840 francs als custs per la 1. etappa da la sanaziun e da l'engrondiment dal stabiliment dal provediment d'aua.
  • Ramosch: A la vischnanca da Ramosch vegn garantida ina contribuziun da maximalmain 217'958 francs per construir la nova serenera Seraplana ed il chanal per aua da plievgia e da naiv Fallun – Poz.
  • Farschno: La revisiun parziala da la planisaziun locala da la citad da Farschno dals 4 da december 2009 vegn approvada.

 
Contribuziuns chantunalas a differentas instituziuns

  • Surselva turissem SA: A la Surselva turissem SA vegn garantida ina contribuziun da totalmain 900'000 francs als custs da transfurmaziun per furmar in'organisaziun turistica regiunala (OTReg).
  • Valposchiavo Calcio: Per il project "Il calcio ti riporta in Valle" (Il ballape ta maina puspè en la val) survegn l'uniun "Valposchiavo Calcio" ina contribuziun da maximalmain 16'500 francs or dal fond da sport.

 
Projects da vias
La regenza ha approvà totalmain 2'302'000 francs per construir e per sanar ils suandants trajects da vias:
- via da Samignun: lavurs d'impressari e da cuvrida, S­chalun – Val Pischöt
- via da Sporz: lavurs da cuvrida, Casa Selva – spartavias Tgantieni


Gremi: regenza
Funtauna: rg chanzlia chantunala dal Grischun

Neuer Artikel