Dapi il 1. da matg collia da nov in currier da velo las tschintg bibliotecas a Cuira. Las utilisadras ed ils utilisaders ch'èn inscrits en las bibliotecas participantas han la pussaivladad da laschar purtar gratuitamain medias en la biblioteca da lur giavisch ubain da restituir medias en lur proxima biblioteca.

Il nov servetsch vegn purschì en las bibliotecas dal center da furmaziun per la sanadad ed ils fatgs socials, da la scola auta da tecnica ed economia, da la biblioteca chantunala, da la scola auta da pedagogia e da la scola auta da teologia.

Il currier da velo transporta tschintg giadas per emna cudeschs, da glindesdi fin venderdi. Cudeschs che vegnan empustads fin a las 15.00 en il catalog online (www.aleph.gr.ch sco er www.nebis.ch) vegnan furnids fin circa a las 17.00 e stattan a disposiziun durant 7 dis per la retratga.

Il currier da velo duai facilitar l'accessibladad da las medias al lieu. Ultra da quai èn las bibliotecas da la scola auta da tecnica ed economia colliadas cun il servetsch da currier surregiunal gratuit da la collavuraziun NEBIS. Uschia pon las utilisadras ed ils utilisaders er empustar cudeschs da Turitg sur la scola auta da tecnica ed economia ed als laschar furnir – per exempel – en la biblioteca chantunala.

Il nov currier da velo è ina purschida dal project da cooperaziun "Bibliotecas da Cuira – cooperaziun tranter las bibliotecas scientificas".


Infurmaziuns:
Christina Bieber, manadra da project scientifica da la biblioteca chantunala dal Grischun, tel.: 081 257 28 60


Gremi: biblioteca chantunala dal Grischun
Funtauna: rg biblioteca chantunala dal Grischun