Cuntegn da la pagina

Communicaziun da la regenza dals 24 da zercladur 2010

  • Erste Mitteilung
  • Neuen Beitrag einfügen

En sia ultima sesida ha la regenza approvà las prescripziuns da chatscha 2010. Quellas prevesan pitschnas adattaziuns tar la chatscha sin tschiervs, sin chavriels e sin chamutschs. Ensemen cun las prescripziuns da chatscha 2010 ha la regenza ultra da quai er gia fixà en moda lianta ils temps da la chatscha auta 2011.

La regenza approvescha las prescripziuns da chatscha 2010.
La regenza ha approvà las prescripziuns da chatscha per l'onn 2010. Quellas reglan la chatscha e determineschan, tge animals che dastgan vegnir sajettads.
L'ultim enviern è disgraziada bler main selvaschina che l'enviern avant. L'effectiv da tschiervs è puspè sa revegnì svelt. La dumbraziun da la primavaira ha mussà l'effectiv il segund grond dals ultims 15 onns. El vegn stimà a var 13'500 animals. Sin basa dal plan da prelevaziun da quest onn ston vegnir sajettads totalmain 4'240 tschiervs. Cun quai ston vegnir sajettads 90 animals dapli che l'onn passà. Sch'ils plans da prelevaziun na vegnan betg ademplids durant la chatscha auta regulara, vegnan ils effectivs regulads en moda fina en il rom d'ina chatscha d'atun cumplementara durant ils mais da november e da december. L'effectiv da chavriels mussa ina leva tendenza vers ensi. El è anc cleramain pli bass che l'onn 2008. Per ch'ils effectivs da chavriels possian sa remetter vinavant, vegn mantegnida la limitaziun dal temp da chatscha da 17 dis. Ils effectivs da chamutschs mussan en pliras regiuns a vista mesauna ina leva tendenza vers engiu. Ils ultims onns èn quests animals – ultra dals disturbis pli e pli intensivs en lur spazi da viver e dals envierns dirs – er vegnids donnegiads da malsognas sco en spezial da la tschorvadad da chamutschs. Ils onns passads ha quella chaschunà perditas considerablas en bleras regiuns. Igl è difficil da prevair, tge consequenzas che quests facturs han. Pervia da quai èsi inditgà d'applitgar ina strategia prudenta. La chatscha sin chauras-chamutsch vegn reducida per quatter dis en tut il chantun e limitada en il contingent da trais e da tgira ad in animal feminin per chatschadra u per chatschader.
La chatscha auta 2010 ha lieu dal 1. fin e cun ils 12 da settember 2010 sco er dals 20 fin e cun ils 28 da settember 2010. Ensemen cun las prescripziuns da chatscha 2010 ha la regenza er gia fixà en moda lianta ils temps da la chatscha auta 2011. Quella dura dals 3 fin ils 11 da settember 2011 sco er dals 19 fin ils 30 da settember 2011.

Da vischnancas e da regiuns

  • Avras: La revisiun parziala da la planisaziun locala da la vischnanca dad Avras, concludida ils 20 da november 2009, vegn approvada.
  • Flem: La revisiun parziala da la planisaziun locala da la vischnanca da Flem, concludida ils 7 da mars 2010, che cumpiglia ina lescha davart la limitaziun e davart la direcziun da la construcziun d'abitaziuns secundaras vegn approvada cun ina resalva.
  • Suraua: Al project per la protecziun cunter lavinas "Pala da Tgiern" garantescha la regenza ina contribuziun da maximalmain 255'000 francs.
  • Tujetsch: Al project per la protecziun cunter lavinas "Val Vadretg" vegn garantida ina contribuziun da maximalmain 484'020 francs.
  • Val S. Pieder: Il project "Dustanza cunter squatschs da naiv Leiserstrasse" vegn approvà da la regenza e sustegnì cun ina contribuziun da maximalmain 90'000 francs.

Contribuziuns chantunalas a differentas instituziuns

  • Tgira da monuments: Il chantun sa participescha cun totalmain 397'900 francs vi da differents projects da la tgira da monuments. Sustegnidas vegnan lavurs da restauraziun vi da la baselgia evangelica e vi da la tur a Farschno, la controlla restauratorica e la realisaziun dal plan da tgira da la baselgia evangelica Son Martin, Ziràn-Reschen, il mantegniment da la ruina dal chastè Tschanüff a Ramosch sco er la restauraziun da la baselgia evangelica da la S. Trinitad a Puschlav.
  • Chasa d'emprendist(a)s da l'Engiadin'ota: A l'instituziun responsabla vegn empermessa ina contribuziun chantunala da construcziun da maximalmain 85'560 francs per lavurs da sanaziun supplementaras sco er per ina montascha.

Projects da vias
La regenza ha approvà totalmain 1'480'000 francs per construir e per sanar ils suandants trajects da vias:
- via da Tràn: lavurs d'impressari Tgiern – Sur Moos


Gremi: regenza
Funtauna: rg chanzlia chantunala dal Grischun

Neuer Artikel