Navigation

Inhaltsbereich

  • Erste Mitteilung
  • Neuen Beitrag einfügen
Tgi che na sa mova betg, stat eri. 55 scolas en il chantun Grischun sa participeschan al project "Scola en moviment" e dian perquai gea a dapli moviment en il mintgadi da scola. La scola da Scuol cumenza ils 23 d'avust 2010 cun la promoziun sistematica dal moviment.

A la tendenza che la scola limitescha considerablamain il basegn da l'uffant da sa mover, ma er al fatg ch'il plaschair da sa mover sa reducescha visiblamain en la vegliadetgna da teenager, stoi vegnir dà cuntrapaisa cun scolas che promovan il moviment. Avunda moviment promova numnadamain il svilup e la confidenza en sasez, augmenta la circulaziun dal sang en il tscharvè e promova l'abilitad da sa concentrar.

En la "scola en moviment" han il moviment, il gieu ed il sport ina gronda impurtanza – tant en las pausas sco er en l'instrucziun. Avant e suenter l'instrucziun van ils uffants ed ils giuvenils a scola resp. a chasa a pe empè da sa laschar transportar dals geniturs cun l'auto. Durant l'instrucziun gida ina concepziun ergonomica da la stanza da scola a seser "cun moviment"; pausas da moviment da trais fin tschintg minutas augmentan la prontadad d'emprender e la capacitad da recepir infurmaziuns. Ina instrucziun orientada al moviment intermediescha la materia sur plirs senns, uschia ch'ils cuntegns restan meglier en memoria. Durant las pausas datti differentas pussaivladads da sa mover che tegnan quint da la vegliadetgna; materialias da moviment adequatas transfurman la plazza da pausa en in spazi da gieu, d'experientschas e d'aventura. Ed en il center stat il plaschair da sa mover e betg il squitsch da prestaziuns sportivas.

55 chasas da scola en il chantun Grischun èn s'obligadas da realisar durant trais onns il project "Scola en moviment". Uschia po gia in terz da las scolaras e dals scolars dal Grischun profitar da quest project.

Uffants e giuvenils dovran in conturn, nua ch'els pon sa mover bler e siglir enturn. Per in svilup saun dovran els dentant er in nutriment equilibrà. Il program "grischun en moviment", che vegn purtà da l'uffizi da sanadad dal Grischun en collavuraziun cun l'uffizi per la scola populara ed il sport, cun il center per prevenziun e promoziun da la sanadad ZEPRA sco er cun la promoziun da la sanadad Svizra, gida a promover in tal ambient. Ensemen cun vischnancas, cun scolinas, cun scolas e cun persunas spezialisadas vegnan realisads projects che megliereschan las cundiziuns da basa per in pais saun. "Scola en moviment en il Grischun" è in tal project.


Infurmaziuns:
Renato Lanfranchi, substitut dal manader da l'uffizi da sanadad, tel. 081 257 26 14


Infurmaziun per las medias:
Mintga scola cumenza il project "Scola en moviment" cun in'occurrenza speziala. Intginas scolas han lantschà la "scola en moviment" gia la primavaira 2010, autras cumenzan il project cun il nov onn da scola 2010/11. Collavuraturas e collavuraturs da las medias che vulan rapportar davart in'occurrenza èn envidads cordialmain. I n'è betg necessari da s'annunziar.

Las proximas occurrenzas han lieu sco suonda:
- scola Quadras, sala communala, Scuol: 23 d'avust 2010, 15.15 – 17.00
- chasa da scola dal stgalim superiur Giacometti, Cuira: 3 da settember 2010, 08.00 – 17.00

Gremi: uffizi da sanadad
Funtauna: rg uffizi da sanadad
Neuer Artikel