Zum Seiteninhalt

Planisà ina nova stalla gronda da muvel per il Plantahof

  • Erste Mitteilung
  • Neuen Beitrag einfügen
Il center da furmaziun e cussegliaziun agricula Plantahof (CFCA) a Landquart duai survegnir ina nova stalla da muvel. La regenza grischuna ha deliberà la missiva correspundenta. Ella propona al cussegl grond da conceder in credit d'impegn da 7 milliuns francs per il nov edifizi. Il parlament vegn a tractar questa fatschenta en la sessiun d'october.

Sin il Plantahof a Landquart duain las stallas existentas da muvel da latg e da vadels vegnir remplazzadas tras ina nova stalla gronda. Las stallas actualas eran vegnidas construidas l'onn 1964, lur interiur è vegnì adattà l'onn 1987 a las pretensiuns da quel temp. Las stallas èn ussa en in nausch stadi architectonic. Uschia n'adempleschan ellas en differents puncts betg pli las pretensiuns staticas. Per pudair cuntinuar cun il manaschi puril stuessan perquai vegnir prendidas en il proxim avegnir mesiras da sanaziun architectonicas massivas. Medemamain na correspundan las stallas, en las qualas ils animals vegnan rentads, betg pli al standard agricul d'ozendi e satisfan mo pli a las normas las pli minimalas da la legislaziun davart la protecziun dals animals.

Realisaziun en etappas
En vista a las mesiras da sanaziun e d'adattaziun ch'èn necessarias en il proxim avegnir vi da l'edifizi da scola e vi dal bain puril dal Plantahof ha il chantun fatg l'onn 2008 in'analisa pli detagliada da las pussaivladads da svilup futuras per il CFCA ed ha elavurà in plan general. Il project da construcziun il pli urgent è damai la construcziun da la nova stalla gronda. Per pudair garantir in andament uschè speditiv sco pussaivel prevesa il plan general ina realisaziun en etappas.

L'emprim modul da l'entir cumplex da la nova stalla cumpiglia in grond clavà cun mulschera, stanzas da scolaziun, in'arena, claus per ils vadels al plaunterren, in deposit da strom e da pavel al plaun sura sco er alas da la stalla che s'extendan vers la pastgira – per las vatgas da latg en il nord e per ils animals giuvens en il sid. La stalla gronda planisada vegn concepida sco stalla libra per var 100 vatgas da latg e sa distingua tras relaziuns da spazi generusas che resguardan il bainesser da las spezias en il sectur da repaus, da moviment e da magliar. Il nov edifizi duai vegnir construì en lain e pussibilitar – sco manaschi da model – cundiziuns da manaschi optimalas. Ils custs d'investiziun totals per il nov edifizi importan 7 milliuns francs.

En in segund modul pon vegnir construids pli tard ina remisa cun in lavuratori e cun abitaziuns per las emploiadas e per ils emploiads che tgiran ils animals. Questas construcziuns annexas na fatg betg part da questa missiva e stuessan puspè vegnir suttamessas al parlament avant che vegnir realisadas. Tenor ina stimaziun dals custs approximativa ston ins far quint cun expensas da var 2.5 milliuns francs per il segund modul.

Previs in nov lieu
Sco nov lieu per la stalla da muvel è previs l'areal a l'ost da la via chantunala. Las lavurs da construcziun duain cumenzar l'atun 2011 suenter la scadenza dal termin da referendum e probablamain vegnir terminadas l'atun 2012, per ch'il Plantahof possia utilisar la nova stalla per il cumenzament dal nov onn da scola. Pervia da lur stadi architectonic critic duain las stallas veglias vegnir disfatgas ed allontanadas.

Tenor l'avis da la regenza correspundan la nova stalla gronda previsa sco er las cumplettaziuns adequatas da l'infrastructura als basegns d'instrucziun actuals d'in lieu da scolaziun agricul modern. Ellas permettan a la scola d'ademplir sia incarica legala da prestaziun en moda effizienta sco er d'intermediar ils cuntegns didactics teoretics en ina moda che sa chatta anc pli datiers da la pratica. L'engrondiment planisà rinforza il CFCA sco center da cumpetenza per l'allevament da muvel e per l'economia d'alp. El metta la basa per posiziunar questa scola grischuna tradiziunala en moda empermettenta en il martgà da furmaziun.

Dapi ch'il manaschi è vegnì surpiglià a la fin dal 19avel tschientaner, s'occupa il Plantahof principalmain da l'allevament da muvel sco er da la scolaziun e da la furmaziun supplementara da la populaziun purila. A las persunas responsablas èsi gartegià da posiziunar il CFCA sco center per l'allevament da muvel, per l'agricultura da muntogna e per l'economia d'alp. Emprendistas ed emprendists da tut la Svizra sa laschan scolar al Plantahof; persunas da l'entir territori germanofon sa participeschan a ses curs. L'onn 2009 eran inscrits al CFCA var 290 scolaras e scolars per ina scolaziun da basa u per ina furmaziun supplementara structurada.


Infurmaziuns:
cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01


Gremi: regenza
Funtauna: rg chanzlia chantunala dal Grischun
Neuer Artikel