En il rom da la refurma dal turissem grischun ha l'uffizi per economia e turissem (UET) prendì per mauns il cumenzament da zercladur in'ulteriura mesira accumpagnanta, la "offensiva da qualitad dal Grischun". Ensemen cun ina gruppa accumpagnanta han las persunas ch'èn incumbensadas cun quest project parzial elavurà temas pussaivels en il sectur da la promoziun da la qualitad. A chaschun da trais lavuratoris regiunals, che han lieu il settember, duain ussa ils circuls interessads survegnir la pussaivladad da discussiunar e da valitar quests cuntegns.

Purschidas, products e servetschs d'auta qualitad èn da gronda impurtanza en spezial en in pajais cun pretschs auts sco la Svizra. Ina strategia da qualitad intermanaschiala duai stgaffir las meglras premissas pussaivlas en quest reguard. En il rom da la refurma dal turissem grischun ha il UET incumbensà il cumenzament da zercladur ina cuminanza da lavur d'elavurar in concept davart l'offensiva da qualitad en il turissem grischun. Sut la direcziun da l'institut per turissem e temp liber da la scola auta da tecnica ed economia (SATE) a Cuira duai il concept esser avant maun fin la fin da l'onn, uschia che sia realisaziun po vegnir prendida per mauns l'onn 2011.

Lavuratoris regiunals
Suenter che l'institut per turissem e temp liber ha dà ina survista da la dumonda da qualitad en il turissem grischun, han ils ulteriurs partenaris dal project ed ina gruppa accumpagnanta elavurà finamiras pussaivlas e temas che duain vegnir promovids en il sectur da la "offensiva da qualitad dal Grischun". A chaschun da trais lavuratoris regiunals, che han lieu mez settember, vuless il UET dar la chaschun als circuls interessads da discussiunar questas finamiras e da valitar quellas ord vista da las destinaziuns respectivamain ord vista da las parts turisticas interessadas. Per il UET èsi fitg impurtant ch'ils acturs interessads dal turissem grischun possian sa participar activamain a quest process. Cunquai che la qualitad stat en in stretg connex cun il svilup regiunal en las vischnancas, èn er las represchentantas ed ils represchentants da las vischnancas envidads da sa participar als lavuratoris. Quels han lieu ils 13 da settember 2010 a Cuira (scola professiunala superiura IFSP da la Svizra sidorientala), ils 15 da settember 2010 a Casti (hotel Albula & Julier) ed ils 16 da settember 2010 a Samedan (Academia Engiadina).

Annunzia
Ils lavuratoris regiunals èn publics. Per motivs organisatorics vegn giavischada in'annunzia fin la fin d'avust tar l'uffizi per economia e turissem dal Grischun, telefon 081 257 23 42.


Infurmaziuns:
- Eugen Arpagaus, manader da l'uffizi per economia e turissem dal Grischun, tel. 081 257 23 77, 079 256 93 94
- Michael Caflisch, manader dal svilup turistic, uffizi per economia e turissem, tel. 081 257 23 73


Gremi: uffizi per economia e turissem
Funtauna: rg uffizi per economia e turissem