Sonda, ils 2 d'october 2010, ha lieu l'inauguraziun uffiziala dal nov auditori sin l'areal dal center da furmaziun e cussegliaziun agricula CFCA Plantahof a Landquart, e quai a chaschun dal di da las portas avertas dal Plantahof. Las visitadras ed ils visitaders pon ir a guardar l'auditori a partir da las 11.00.

Il Plantahof vegn manà sco manaschi certifitgà ISO cun ina incarica da prestaziun e cun in preventiv global ed el giauda ina stima che tanscha lunsch sur il cunfin dal chantun ora. Cunzunt las allevaturas ed ils allevaturs d'animals sco er las possessuras ed ils possessurs da muaglia da l'entira Svizra e da l'exteriur germanofon apprezieschan la tradiziun da porscher seminaris da furmaziun supplementara, da far experiments pratics innovativs e da tgirar ina tratga da muvel d'auta qualitad. Ma er la scolaziun da pura resp. da pur che vegn purschida vala sin plaun naziunal sco moderna, variada e pretensiusa.

Per restar in center da scolaziun dominant e per pudair dumagnar l'affluenza creschenta da clientas e da clients han ins sentì dapi in tschert temp il basegn da construir in nov auditori. Grazia ad ina donaziun generusa d'ina fundaziun privata ha quest project da construcziun pudì vegnir lantschà l'atun 2008. Ins ha organisà ina concurrenza da projects tranter set architects grischuns enconuschents. L'auditori na duai betg vegnir duvrà per la scolaziun da basa, mabain en emprima lingia per la furmaziun supplementara e per la transmissiun d'infurmaziuns per las famiglias da purs activas dal Grischun e dals chantuns vischins.

Differentas utilisaziuns èn pussaivlas
Suenter avair sviluppà intensivamain il project da l'architect Valerio Olgiati da Flem e suenter l'avair planisà en il decurs da l'onn 2009, è quel project vegnì realisà entaifer in onn. Il cubus cun sias cleras conturas ed en colur d'antracit sco er cun ses tetg pregnant ad in'ala è plazzà en ina moda clera e definescha da nov la plazza davant l'entrada principala e davant la mensa. El permetta differentas utilisaziuns novas per occurrenzas publicas davant il Plantahof. En ses intern impressiuneschan las proporziuns spazialas extraordinarias e la qualitad atmosferica. Il nov auditori permetta in'utilisaziun multifuncziunala per 130 fin 180 participantas e participants. Ultra da sia utilisaziun classica sco auditori è el er adattà per seminaris, per dietas e per discussiuns al podium.

Ils custs calculads da 2.75 milliuns francs han pudì vegnir resguardads. Grazia a la donaziun generusa da 2 milliuns francs, sto il chantun anc surpigliar custs da 0.75 milliuns francs. La collavuraziun conscienziusa ed orientada a la finamira da tut las parts participadas ha pussibilità in andament speditiv, resguardond la qualitad, ils custs ed ils termins.

L'inauguraziun uffiziala dal nov auditori ha lieu sonda, ils 2 d'october 2010 en il rom dal di da las portas avertas dal Plantahof. Las visitadras ed ils visitaders dal di da las portas avertas dal Plantahof pon ir a guardar l'auditori a partir da las 11.00. Plinavant vegn Valerio Olgiati a tegnair in referat en il nov auditori duas emnas pli tard, e quai sonda ils 16 d'october 2010, a las 17.00.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31


Gremi: uffizi da construcziun auta
Funtauna: rg uffizi da construcziun auta