Navigaziun principala

Cuntegn da la pagina

Inauguraziun da la nova basa da mantegniment a Mustér

  • Erste Mitteilung
  • Neuen Beitrag einfügen
Il 1. d'october 2010 vegn inaugurada uffizialmain la nova basa da mantegniment da l'uffizi da construcziun bassa, district 6, a Mustér. Entaifer in onn èn las localitads insuffizientas vegnidas remplazzadas tras in nov stabiliment funcziunal. La nova basa è accessibla a la publicitad interessada a chaschun d'in di da las portas avertas che ha lieu sonda, ils 2 d'october 2010.

Il district 6 a Glion tgira ina rait da vias da 284 kilometers. Da quai èn 93 kilometers vias principalas e 191 kilometers vias da colliaziun. El cumpiglia tut la Surselva da La Punt fin al pass da l'Alpsur resp. al pass dal Lucmagn inclusiv tut las vals lateralas. Cun questa rait da vias vasta e pretensiusa e cun ina surfatscha da 1'383 kilometers quadrat è il district da Glion il segund grond dal chantun. Da la basa da Mustér anora garanteschan totalmain otg collavuraturs il mantegniment architectonic e funcziunal da las vias da l'Alpsur e dal Lucmagn sco er da las vias lateralas appartegnentas.

Las localitads existentas n'han lunschor betg pudì ademplir pli las pretensiuns che vegnan fatgas ozendi envers in mantegniment modern da las vias. Il fatg che las localitads sa chattavan en differents stabiliments ha difficultà il manaschi dal mantegniment da la rait da vias. Remisas per vehichels mancavan per gronda part e stuevan vegnir prendidas en locaziun en differents lieus per part betg cuntentaivels. Il material ed ils apparats vegnivan deponids en sustas provisoricas. Al persunal stevan a disposiziun locals da segiurn e gardarobas d'in standard fitg modest.

Nova basa moderna
En il territori da Plaun da Diras a Mustér ha pudì vegnir acquistà l'onn 2007 sper la via da l'Alpsur in bain immobigliar adequat per construir là ina nova basa. Sa basond sin il concept da gestiun e sin il program da spazi da l'uffizi da construcziun bassa è vegnì planisà in edifizi simpel ed adequat en lain.
 
La realisaziun ha durà in onn. Sut in sulet tetg èn ussa unids ina halla per parcar vehichels, localitads da deposit, in local per lavar vehichels sco er biros, locals da segiurn e gardarobas per ils collavuraturs. In deposit extern ed in implant da silo per 150 meters cubic sal e per 150 meters cubic crappella cumpletteschan la purschida. Il stabiliment sa distingua tras ina moda da construcziun funcziunala e persistenta e tras furmas cleras. L'edifizi integral en lain, ch'è construì en il standard da Minergie, vegn stgaudà cun pellets da lain ed ha in implant solar per producir aua chauda. Ils 360 meters cubic lain ch'èn vegnids duvrads per construir il stabiliment derivan da la regiun.

Il nov stabiliment a Plaun da Diras sut il vitg da Segnas correspunda a las pretensiuns che vegnan fatgas ozendi envers in basa moderna e sustegna ils collavuraturs en lur servetsch quotidian sin via.
 
Grazia a l'engaschament ed a la collavuraziun excellenta tranter il patrun da construcziun, il planisader, las interpresas e la vischnanca han pudì vegnir cuntanschidas las finamiras dal project tant en quai che reguarda la qualitad, ils custs sco er ils termins.

Il di da las portas avertas ha lieu sonda, ils 2 d'october 2010, da las 10.00 fin a las 14.00.


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31
- Reto Knuchel, schef dal mantegniment da vias, uffizi da construcziun bassa, tel. 081 257 37 35


Gremi: uffizi da construcziun auta dal Grischun
Funtauna: rg uffizi da construcziun auta dal Grischun
Neuer Artikel