Navigation

Inhaltsbereich

  • Erste Mitteilung
  • Neuen Beitrag einfügen
Il vitg stretg da Schmitten construì per lung da la via duai vegnir deliberà dal traffic da transit tras in sviament avert. Il project vegn exponì dals 8 da november fin ils 8 da december en la vischnanca da Schmitten.

Dapi onns è il traffic da transit ina gronda mulesta per la populaziun da Schmitten. En las vias stretgas datti regularmain colonnas, balcuns vegnan stgarpads davent ed edifizis vegnan donnegiads. Las pedunas ed ils peduns sco er il traffic betg motorisà èn exponids senza protecziun al traffic sin via.

Questa situaziun duai vegnir meglierada uschè svelt sco pussaivel tras in sviament favuraivel al sid dal vitg che duai vegnir realisà en moda tecnicamain simpla cun paucas construcziuns artifizialas. Il project correspundent vegn exponì publicamain dals 8 da november fin ils 8 da december en la vischnanca da Schmitten. Durant quest temp pon tut las parts ch'èn pertutgadas dal project s'exprimer en chaussa respectivamain far protesta.

Gia l'onn 1982 è stada exponida publicamain ina proposta per ina soluziun che preveseva in sviament al nord dal vitg cun in tunnel d'ina lunghezza da 370 meters. Las protestas da quel temp pretendevan en emprima lingia ch'il project vegnia repassà en il sectur dal portal ost. Per motivs finanzials è il project dentant betg vegnì persequità vinavant. Resguardond las pretensiuns da segirezza actualas chaschunass il sviament nord cun in tunnel custs d'almain 35 – 45 milliuns francs. Quest tunnel curt cumenza e finescha en il vitg e n'ademplescha uschia insumma betg pli las pretensiuns ad in sviament. Qua tras stuess ins anc far quint cun bler dapli custs. En vista ad auters projects impurtants sin vias principalas cun bler dapli traffic durant l'entir onn na po in sviament d'in vitg d'ina tala dimensiun betg vegnir finanzià en moda realistica a pli lunga vista.

Cun la finamira da proteger almain las participantas ed ils participants dal traffic ils pli flaivels cunter il traffic da transit, ha l'uffizi da construcziun bassa dal Grischun elavurà in project per construir in passape senza interrupziun en il vitg. Durant l'exposiziun publica l'atun 2008 han bleras proprietarias cunfinantas e blers proprietaris cunfinants pertutgads crititgà energicamain las stretgas restantas sco er l'aboliziun dals parcadis sper lur chasas.

A chaschun d'ina radunanza d'orientaziun il december 2009 è vegnì preschentà a la populaziun in nov studi da project che prevesa in sviament al sid da Schmitten. Il schaner 2010 ha la suprastanza communala da Schmitten dumandà il departament da construcziun, traffic e selvicultura dal Grischun d'elavurar in project d'exposiziun per la soluziun preschentada. Quel è ussa avant maun. Il sviament sid d'ina lunghezza da 2'300 meters banduna il trassé actual da la via principala sper la gruppa da chasas Chappali, traversa l'aual da Schmitten e fa al sid ina gronda storta enturn il vitg. La reuniun cun la via dal Landwasser ha lieu ordaifer l'abitadi a l'ost. Il vitg da Schmitten vegn collià cun il nov sviament tras ils dus access ost e vest. Il vial da quest traject da via ha ina ladezza da 6 meters. Ultra dal studi da planisaziun cuntegna il project d'exposiziun mesiras da protecziun cunter la canera en furma da construcziuns da sustegn ensemnadas da la vart da la muntogna per las chasas che sa chattan en vischinanza dal trassè dal sviament. Per ils disturbis da l'ambient che na pon betg vegnir evitads, malgrà tut il resguard che vegn prendì en la projectaziun, èn previsas ulteriuras mesiras da cumpensaziun ecologicas. Ils custs vegnan calculads cun 17 milliuns francs. Per realisar il project vegni fatg quint cun in temp da construcziun da 2 fin 3 onns.


Infurmaziuns:
- Heinz Dicht, inschigner superiur da l'uffizi da construcziun bassa, tel. 081 257 37 01
- Peter Stirnimann, responsabel per las medias, uffizi da construcziun bassa, 081 257 37 11


Gremi: uffizi da construcziun bassa
Funtauna: rg uffizi da construcziun bassa
Neuer Artikel