Cuntegn da la pagina

Communicaziun da la regenza dals 25 da november 2010

  • Erste Mitteilung
  • Neuen Beitrag einfügen

La regenza grischuna ha concludì da cuntinuar cun la concurrenza per promover la lavur culturala professiunala tar projects pitschens. Ultra da quai ha ella formulà sias posiziuns tar differentas missivas da consultaziun da la confederaziun.

Concurrenza per promover la lavur culturala professiunala tar projects pitschens
La concurrenza per promover la lavur culturala professiunala ch'è vegnida introducida l'onn 2008 en il chantun Grischun cuntinuescha e vegn publitgada mintga onn. Quai ha concludì la regenza grischuna. Per la concurrenza stat a disposiziun in preventiv general da 100'000 francs or dal fond da la lottaria naziunala. Questa summa permetta da premiar maximalmain 10 projects a maximalmain mintgamai 10'000 francs, e quai sco stipendis libers u sco contribuziuns ad ovras.
Il project cuntinuescha definitivamain pervia da la gronda dumonda, pervia da l'inoltraziun da projects ch'èn interessants dal punct da vista artistic ed er pervia dals resuns positivs da vart da las artistas e dals artists. Durant la fasa da pilot da trais onns da 2008 fin 2010 èn vegnids inoltrads en media 45 projects per onn. Uschia vegn mantegnì ed instituziunalisà in instrument per promover la lavur culturala professiunala ch'è sa cumprovà e ch'è impurtant.
La concurrenza tar projects pitschens cumplettescha la concurrenza tar projects pli gronds per promover la lavur culturala professiunala che vegn realisada dapi l'onn 1998. En questa concurrenza vegnan surdadas contribuziuns ad ovras u stipedis d'in import da maximalmain 20'000 francs.

La regenza refusescha privilegis da taglia per il respargn immobigliar
La regenza grischuna pleda cunter privilegis da taglia per il respargn immobigliar. Quest privilegi na maina betg a la finamira, n'è betg confurm a la constituziun ed ha per consequenza ch'il dretg fiscal daventa anc pli cumplitgà. Quai constatescha la regenza en sia resposta da consultaziun tar ina iniziativa parlamentara da la cumissiun per economia e taxas dal cussegl dals chantuns. En questa iniziativa suttametta la cumissiun ina cuntraproposta indirecta a las iniziativas dal pievel "Access a proprietad grazia al respargn immobigliar" sco er "iniziativa davart il respagn immobigliar".
Tenor la regenza pregiuditgescha la deducziun previsa per il respargn immobigliar il princip da la taxaziun tenor la capacitad economica. Ultra da quai n'èsi betg cler quant fitg ch'ina tala deducziun possia effectivamain augmentar la quota d'atgna proprietad. Per promover la construcziun d'abitaziuns bastan – a l'avis da la regenza – las mesiras vertentas dal dretg fiscal, e quai en il rom da la prevenziun professiunala e liada. I na vul nagina nova deducziun che fa daventar il dretg fiscal puspè pli cumplitgà ed a medem temp main gist.

Zonas ecologicas vegnan beneventadas
La regenza grischuna beneventa la proposta da la confederaziun da crear la basa legala per stgaffir zonas ecologicas. Sco che la regenza scriva en sia resposta da consultaziun a la confederaziun n'èsi il mument betg pussaivel per il chantun Grischun da stgaffir zonas ecologicas. Differents studis davart aglomeraziuns han dentant mussà che zonas ecologicas èn ina mesira effizienta – sch'ellas èn concepidas en moda adequata – per meglierar considerablamain la qualitad da l'aria en in lieu determinà.
Fin ussa n'èsi betg stà pussaivel da realisar talas zonas per motivs dal dretg da traffic. En zonas ecologicas èsi previs da laschar circular mo vehichels cun relativamain paucas emissiuns. La creaziun da talas zonas duai reducir la grevezza per l'ambient causa emissiuns dal traffic sin via.

Resalvas envers la missiva da la confederaziun davart la lescha per promover la cultura
La regenza grischuna beneventa da princip las stentas da la confederaziun da controllar politicamain e finanzialmain la promoziun da la cultura da nov cun ina strategia da 4 onns. En sia resposta da consultaziun tar la "missiva davart la lescha per promover la cultura 2012-2015" exprima la regenza dentant resalvas e giavischs.
Uschia pretenda la regenza che la confedraziun surpiglia sia responsabladad finanziala. Ella spetga che la confederaziun augmentia sin 125 milliuns francs sia contribuziun en il sectur da la protecziun da la patria e da la tgira da monuments per ils onns 2012-2015. La varianta minimala dad 85 milliuns francs ch'è vegnida recepida en la missiva davart la lescha per promover la cultura na basta dentant betg, perquai che ina reducziun da las prestaziuns dal maun public periclitass l'existenza da l'ierta culturala architectonica.
Ultra da quai pretenda la regenza che las instituziuns federalas da la promoziun da la cultura vegnian sustegnidas er vinavant cumplettamain da la confederaziun. Las incumbensas federalas èn – ultra da las instituziuns culturalas federalas – la tgira da monuments e la protecziun da la patria, il sectur dals films sco er la preschientscha culturala a l'exteriur. Tenor l'avis da la regenza n'èsi la finala betg chaussa da la confederaziun d'influenzar la politica culturala dals chantuns tras finanziaziuns inizialas. La confederaziun duai plitost sviluppar eventuals programs ensemen cun ils chantuns e cun las citads e finanziar quels en moda adequata.

Da vischnancas e da regiuns 

  • Tujetsch: Il project "Rempar da lavinas Plauncas Nireil" da la vischnanca da Tujetsch vegn approvà. Als custs vegn garantida ina contribuziun da maximalmain 287'550 francs.
  • Scharàns: La revisiun parziala da la planisaziun locala da la vischnanca da Scharàns dals 3 da mars 2010 vegn approvada.

 
Contribuziuns chantunalas a differentas instituziuns 

  • Institut da perscrutaziun AO Tavau: A l'institut da perscrutaziun AO Tavau vegn garantida ina contribuziun da totalmain 880'000 francs, annualmain 220'000 francs, per ils onns 2010 fin 2013. La contribuziun che vegn impundida per stipendis, sa basa sin ina cunvegna da prestaziun cun il chantun.

 
Chaussas persunalas 

  • Fadri Ramming, domicilià a Cuira, è vegnì elegì sco commember e sco president da la cumissiun administrativa dals servetschs psichiatrics dal Grischun per il rest da la perioda d'uffizi fin ils 30 da zercladur 2013. El daventa successur da Mario Cavigelli.

 
Gremi: regenza
Funtauna: rg chanzlia chantunala dal Grischun

Neuer Artikel