La cumissiun predeliberanta dal cussegl grond s'exprima per la fusiun da las vischnancas da Grüsch, da Fanas e da Valzeina a la nova vischnanca da Grüsch.

En sia missiva dals 24 d'avust 2010 propona la regenza grischuna al cussegl grond d'approvar la fusiun da las vischnancas da Grüsch, da Fanas e da Valzeina a la nova vischnanca da Grüsch. La fusiun duai vegnir realisada per il 1. da schaner 2011. Sut il presidi dal commember dal cussegl grond Maurizio Michael ha la cumissiun predeliberanta dal cussegl grond predeliberà ussa questa fatschenta per mauns dal cussegl grond che la vegn a tractar en la sessiun da december 2010. A questa sesida èn stads preschents er il cusseglier guvernativ Martin Schmid e la represchentanza da las vischnancas e dals circuls pertutgads.

Las votantas ed ils votants da Grüsch, da Fanas e da Valzeina han approvà ils 18 da zercladur 2010 la fusiun da lur vischnancas a la nova vischnanca da Grüsch. La cumissiun predeliberanta dal cussegl grond è sa laschada infurmar al lieu da represchentantas e da represchentants da las vischnancas e da las autoritads davart il project da fusiun. Suenter ina debatta detagliada ha ella decidì unanimamain da proponer al cussegl grond d'approvar la fusiun da las vischnancas da Grüsch, da Fanas e da Valzeina e da metter en vigur il conclus per il 1. da schaner 2011. La cumissiun è persvadida ch'i sa tracta d'ina fusiun utila, da la quala resorta ina vischnanca nova e ferma per il chantun Grischun. Perquai che las trais vischnancas che vulan fusiunar n'appartegnan betg al medem circul, vegn il circul da Seewis a perder cun la fusiun las duas vischnancas da Fanas e da Valzeina al circul da Schiers.

Cun questa fusiun tracta il cussegl grond la proxima sessiun da december l'unica fusiun da vischnancas da l'onn 2010. Uschia dessi – premess ch'il parlament approveschia questa fusiun – per il 1. da schaner 2011 anc 178 vischnancas en il Grischun.


Infurmaziuns:
president da la cumissiun Maurizio Michael, tel. 079 798 90 92


Gremi: cumissiun predeliberanta per la fusiun a la vischnanca da Grüsch
Funtauna: rg cumissiun predeliberanta per la fusiun a la vischnanca da Grüsch