Cuntegn da la pagina

Il Grischun vegn mess en ina rait politica

  • Erste Mitteilung
  • Neuen Beitrag einfügen
Co concepescha il Grischun sias relaziuns externas? Cun tge partenarias e cun tge partenaris collavura il chantun regularmain? Tge termins impurtants cuntegna l'agenda politica? Las respostas chattais Vus sin www.gr.ch/Aussenbeziehungen.

La finamira da la regenza èsi da furmar colliaziuns politicas che han success per il Grischun. Las relaziuns externas servan a la regenza sco instrument per stabilir contacts, per tgirar relaziuns, per furmar allianzas, per prender influenza, per intermediar infurmaziuns e per ademplir incumbensas ensemen cun partenarias e cun partenaris. La pagina d'internet www.gr.ch/Aussenbeziehungen ch'è gist vegnida endrizzada concentrescha las infurmaziuns davart las relaziuns externas dal Grischun da nov en in lieu, dat ina survista vasta ed infurmescha cumplessivamain davart las raits multifaras dal Grischun.

Chartas da navigaziun interactivas
En il center da la pagina d'internet stat ina charta da navigaziun interactiva. Ella dat la pussaivladad da sa far in maletg da las relaziuns multifaras dal Grischun entaifer curt temp. Cun in clic cun la mieur cumparan ils chantuns, ils pajais u las regiuns, cun las qualas il Grischun collavura entaifer ed ordaifer instituziuns existentas. Sin paginas successivas èn disponiblas ulteriuras infurmaziuns davart las differentas instituziuns interchantunalas, naziunalas e transcunfinalas sco er davart las relaziuns bilateralas dal chantun Grischun inclusiv links e purschidas per chargiar giu infurmaziuns.

Strategias e projects
Areguard il cuntegn infurmescha la pagina d'internet davart las strategias ch'il chantun observa per extender e per tgirar las relaziuns externas e davart tge temas e tge projects che las conferenzas e las instituziuns discuteschan actualmain. Clers daventan uschia ils accents politics ch'ils gremis interchantunals ed internaziunals mettan en lur collavuraziun. Communicaziuns da quests gremis e posiziuns da la regenza, en spezial davart temas da la politica federala furman il connex concret cun la lavur en il sectur da las relaziuns externas. Ils renviaments a la basa legala mussan il rom da las pussaivladads e da las obligaziuns d'agir.

Agenda e links
Cumplettada vegn la purschida en l'internet cun ina agenda che dat ina curta survista dals termins impurtants. Ultra da quai èn avant maun links ad infurmaziuns d'auters chantuns, da la confederaziun e d'instituziuns da la collavuraziun transcunfinala. La pagina d'internet vegn messa à jour e cumplettada permanentamain cun infurmaziuns davart svilups actuals. Uschia duai la "politica exteriura" dal chantun Grischun daventar pli concreta.


Gremi: regenza
Funtauna: rg chanzlia chantunala dal Grischun
Neuer Artikel