Cuntegn da la pagina

Communicaziun da la regenza dals 9 da december 2010

  • Erste Mitteilung
  • Neuen Beitrag einfügen

En il chantun Grischun duain las emissiuns d'amoniac vegnir reducidas en l'agricultura. La regenza grischuna ha approvà in concept correspundent. Ultra da quai ha la regenza decidì ch'i na dettia nagina votaziun davart projects chantunals ils 13 da favrer 2011. Dal rest ha ella fixà la cumpensaziun da la chareschia per il 1. da schaner 2011 sco er formulà sia posiziun tar dus projects federals da consultaziun.

Approvà in project per reducir las emissiuns d'amoniac en l'agricultura
Il chantun Grischun lantscha l'onn proxim in project per reducir las emissiuns d'amoniac en l'agricultura. La regenza grischuna ha approvà il project ed ha deliberà contribuziuns chantunalas da promoziun dad 1'640'000 francs. La premissa è ch'er la confederaziun permettia quest project. L'uffizi d'agricultura e da geoinfurmaziun è vegnì incumbensà da realisar quest project da resursas che dura ils onns 2011 fin 2016.
La finamira è quella da promover il tractament correct da ladim natiral sin manaschis agriculs. Uschia duain las emissiuns d'amoniac en il Grischun vegnir reducidas en il futur per var 9 pertschient. Per cuntanscher questa finamira vegnan proponidas differentas mesiras che sa basan sin in sistem da stimul. Latiers tutgan – ultra da mesiras organisatoricas sin ils manaschis agriculs – tranter auter l'utilisaziun d'in indriz da distribuziun cun in uder che vegn stratg suenter sco er mesiras tar il pavel da las vatgas da latg. Questas mesiras duain er gidar a meglierar la reputaziun da l'agricultura en il chantun turistic, perquai che las emissiuns da spizza vegnan reducidas il medem mument.

Nagins projects chantunals da votaziun ils 13 da favrer 2011
La regenza grischuna ha prendì enconuschientscha dal fatg che l'iniziativa dal pievel "per la protecziun cunter la violenza tras armas" vegn suttamessa sco project federal a la votaziun dal pievel la dumengia, ils 13 da favrer 2011. Quest di na vegni votà davart nagins projects chantunals.

La cumpensaziun da la chareschia vegn fixada a 0,3 pertschient
Las collavuraturas ed ils collavuraturs da l'administraziun chantunala e las persunas d'instrucziun da las scolas popularas dal Grischun survegnan a partir dal 1. da schaner 2011 ina cumpensaziun da la chareschia da 0,3 pertschient. Quai ha concludì la regenza grischuna.
Tenor la lescha dal persunal cumpensescha la regenza la chareschia mintgamai la fin da l'onn per l'onn chalendar suandant. En quest connex è decisiv il stadi da l'index naziunal dals pretschs da consum la fin da november.

La flexibilisaziun da la politica da la surfatscha da guaud vegn beneventada
La regenza grischuna s'exprima a favur da l'intenziun da flexibilisar la politica da la surfatscha da guaud che la cumissiun per ambient, planisaziun dal territori ed energia dal cussegl dals chantuns ha exprimì en ina iniziativa parlamentara. Sco quai che la regenza menziunescha en sia resposta da consultaziun sustegna ella la finamira dal project, spetga dentant a medem temp ina flexibilisaziun da la politica da la surfatscha da guaud che va pli lunsch.
La midada planisada da la lescha federala davart il guaud ha en mira da schliar conflicts cun surfatschas privilegiadas da l'agricultura, cun territoris prezius per l'ecologia u per l'agricultura sco er cun la protecziun cunter aua gronda che resultan en territoris, en ils quals la surfatscha dal guaud crescha. Quai duai vegnir fatg cun flexibilisar l'obligaziun da cumpensar ina runcada en ils territoris pertutgads sco er cun abolir per part la noziun da guaud dinamica. En quest connex na duai la surfatscha dal guaud betg vegnir reducida ed il scumond da runcar duai restar.
Tenor l'avis da la regenza sto quest project vegnir formulà en moda pli averta per stgaffir la libertad d'agir ch'è necessaria per permetter soluziuns federalisticas sin plaun chantunal. En connex cun l'obligaziun da cumpensar ina runcada pretenda la regenza d'extender il catalog d'excepziuns correspundent. Necessaria è ultra da quai ina coordinaziun cun ils secturs da l'agricultura, da la protecziun da la natira e da la patria sco er da la protecziun da las auas. Sulettamain sin basa da la legislaziun forestala na po il problem da l'extensiun nungiavischada dal guaud betg vegnir schlià.

Da vischnancas e da regiuns 

  • Tschappina: La revisiun parziala da la planisaziun locala, concludida da la vischnanca da Tschappina ils 24 da favrer 2010, vegn approvada.

 
Contribuziuns chantunalas a differentas instituziuns 

  • Uniun "palliative gr": La regenza approvescha l'incarica da prestaziun dal chantun Grischun a l'uniun "palliative gr". Per ademplir las incumbensas surdadas dal chantun survegn l'uniun ina contribuziun pauschala annuala da 100'000 francs. L'uniun s'engascha per promover uschè bain sco pussaivel e per garantir durablamain in tractament palliativ ambulant e staziunar, ina tgira ed in accumpagnament d'umans grevamain malsauns en il chantun Grischun.
  • Regiun Surselva: A la regiun Surselva vegn garantida per la perioda 2011 – 2015 ina contribuziun maximala da totalmain 825'000 francs, maximalmain 165'000 francs per onn, al manaschament regiunal. Quai en il rom da la nova politica regiunala da la confederaziun (NPR).
  • Tgira da monuments: Per restaurar totalmain ina chasa d'abitar e da fatschenta a Puschlav, Borgo, vegn pajada ina contribuziun maximala da 72'800 francs.

 
Gremi: regenza
Funtauna: rg chanzlia chantunala dal Grischun

Neuer Artikel