Zum Seiteninhalt

L'augment da la segirezza d'enviern da la via dal Malögia tranter Segl/Föglias e Plaun da Lej occupa vinavant il chantun

  • Erste Mitteilung
  • Neuen Beitrag einfügen
Il chantun Grischun sa stenta vinavant d'augmentar la segirezza d'enviern sin la via dal Malögia. Il chantun è pront d'elavurar novas variantas e vegn a laschar far in nov studi respectiv.

Cun ina retscha da mesiras ha il chantun gì l'intenziun d'augmentar pragmaticamain la segirezza d'enviern sin la via dal Malögia tranter Segl/Föglias e Plaun da Lej, e quai a curta fin a media vista. Ultra da pitgas per siglientar lavinas, da rempars da deviament e d'in tunnel curt è stada previsa per quai ina via da sviament d'in vial en il sectur dal territori d'abitadi da Segl che fiss vegnida duvrada mo durant il temp da privel.

Enconuschentamain ha la radunanza communala da Segl refusà ils 8 d'october 2010 in tal sviament sur ses territori communal. Respectond questa decisiun renunzia il chantun da sfurzar tras la soluziun previsa cunter la veglia da la populaziun da Segl.

En in discurs cun il schef dal departament da construcziun, traffic e selvicultura dal Grischun sco er cun las persunas responsablas da la vischnanca e da las duas regiuns Engiadin'ota e Bregaglia èn ins sa cunvegnì d'elavurar novas variantas per meglierar persistentamain la segirezza d'enviern sin il traject da via en dumonda. Per quest intent duai vegnir dada l'incarica da far quest enviern in studi che duai sclerir las premissas e las cundiziuns generalas per in'alternativa tar il "sviament pitschen" ch'è vegnì sbittà. Ils resultats en chaussa duain esser avant maun fin l'atun che vegn.

Sco ils onns passads duai en il fratemp pudair vegnir duvrada la ruta da sviament cumprovada tras il vitg che vegn permessa da la vischnanca da Segl, sche las relaziuns èn precaras.


Infurmaziuns:
Heinz Dicht, inschigner superiur, uffizi da construcziun bassa, tel. 081 257 37 01


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel