Il departament d'educaziun, cultura e protecziun da l'ambient ha elegì Stephan Kunz sco nov directur dal museum d'art dal Grischun. El surpiglia la direcziun dal museum d'art dal Grischun il 1. d'october 2011.

Stephan Kunz ch'è domicilià a Wettingen è vegnì elegì dal departament d'educaziun, cultura e protecziun da l'ambient sco nov directur dal museum d'art dal Grischun. El è il successur da Beat Stutzer che ha manà il museum dapi l'onn 1982 e che va en pensiun anticipada per la fin da settember 2011.

Kunz, ch'è naschì l'onn 1962, ha studegià istorgia d'art, germanistica e filosofia a Turitg ed a Berlin. Dapi l'onn 1988 è el activ en la chasa d'art da l'Argovia, tranter auter sco curatur e dapi l'onn 2003 sco vicedirectur. En quest connex è el stà participà decisivamain a l'engrondiment da la chasa d'art da l'Argovia ed a l'elavuraziun d'in nov concept da gestiun. Ultra da quai ha el lavurà en differents gremis ed en differentas fundaziuns ed è stà engaschà per l'art en la publicitad. Kunz surpiglia la direcziun dal museum d'art dal Grischun il 1. d'october 2011.


Infurmaziuns:
Barbara Gabrielli, manadra da l'uffizi da cultura, tel. 081 254 16 06


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient