Il post da stab per l'egualitad da las schanzas ed adebar, il post da cussegliaziun per planisaziun da famiglia, sexualitad, gravidanza e partenadi, lantschan ina rudella nova da gravidanza. Ils 8 d'avrigl 2011 a las 10.30, en la bar da café dal teater a Cuira, vegn la rudella da gravidanza preschentada a la publicitad en il rom d'ina vernissascha.

Daventar geniturs è per dunna ed um ina part rigurusa da la vita. Daventar geniturs signifitgescha midadas en differents champs da la vita sco la professiun, la relaziun, la ballantscha tranter viver e lavurar e la garanzia da l'existenza.

La rudella nova da gravidanza "Ina chaussa radunda" porscha a geniturs, a persunas spezialisadas da la medischina ed ad autras persunas spezialisadas bleras ulteriuras infurmaziuns che mo las usitadas davart la gravidanza, davart il termin da la naschientscha e davart il svilup da l'uffant. Ella cuntegna vastas infurmaziuns davart ils temas che chaschunan midadas e sfidas tar ils geniturs. Ils geniturs duain savair nua ch'els pon ir per agid p.ex. tar problems durant la gravidanza, a la plazza da lavur, tar daventar geniturs e restar in pèr, tar la ballantscha tranter viver e lavurar, tar ils dretgs e tar las finanzas, tar ils maletgs novs da las rollas, tar violenza en il partenadi ed en famiglia. Per tut questas dumondas stattan adebar ed il post da stab per l'egualitad da las schanzas a disposiziun a persunas pertutgadas per cussegliaziuns gratuitas e discretas.

Persunas interessadas pon s'annunziar per la vernissascha fin ils 6 d'avrigl 2011 sut info@chancengleichheit.gr.ch u per telefon 081 257 35 70.


Infurmaziuns:
Susanna Mazzetta, post da stab per l'egualitad da las schanzas, tel. 081 257 35 72 (me, ver), e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas