Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun prenda danovamain part a la retschertga online che vegn fatga en l'entira Svizra per eruir quant cuntentas e cuntents che las utilisadras ed ils utilisaders èn cun ils portals d'internet dals chantuns. Fin la fin da zercladur pon persunas interessadas sa participar a l'enquista sut www.gr.ch.

Quant cuntentas e quant cuntents èn las burgaisas ed ils burgais cun ils portals d'internet dals chantuns? L'institut per psicologia da l'universitad da Basilea emprova da sclerir questa dumonda. Cun il consentiment dals chantuns fa l'institut – suenter ils onns 2006 e 2008 – ina terza retschertga davart la cuntentientscha en il sectur dal e-government en Svizra. Cun il studi duai vegnir eruì, quant cuntentas e quant cuntents che las utilisadras e ch'ils utilisaders èn cun ils portals d'internet da tut ils 26 chantuns svizzers.

Er il chantun Grischun sa participescha puspè a la retschertga online. A partir d'immediat fin la fin da zercladur 2011 han persunas interessadas la pussaivladad da valitar la purschida online dal chantun sut www.gr.ch. Il questiunari sa divida en differents secturs e cuntegna tut en tut 34 dumondas. Ils resultats duain er gidar a meglierar la qualitad da la purschida. Las participantas ed ils participants da la retschertga han la pussaivladad da sa participar ad ina concurrenza e da gudagnar in iPhone 4 u in da diesch iPod Shuffle.


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel