Causa il nov grond privel da fieu per cultira e guaud ha l'uffizi forestal relaschà in scumond absolut da far fieu en ils guauds ed en la vischinanza dals guauds al nord da las Alps dal Grischun (incl. l'Engiadina bassa).
L'uffizi forestal avertescha en vista a l'aura ch'è actualmain sitga e chauda dal grond privel da fieu per la cultira e per il guaud al nord da las Alps dal Grischun. L'aura da primavaira fitg temprada e la setgira da las ultimas emnas han setgentà fermamain il terren e las stresas da vegetaziun. Sch'i dat in incendi en la vegetaziun setga, po il fieu sa derasar fitg svelt. Tras la malprecauziun cun fieus da rumida en l'agricultura, cun products da fimar e cun fuclars hai dà – durant las emnas passadas – passa 50 incendis da guaud che han pudì vegnir stizzads a temp mo grazia a la svelta intervenziun dals pumpiers.
Al nord da las Alps (incl. l'Engiadina bassa) vala in scumond absolut da far fieu en ils guauds ed en la vischinanza dals guauds.
Products da fimar e battafieus na dastgan betg simplamain vegnir bittads davent. Che la situaziun sa mitigeschia, dastga vegnir spetgà pir suenter plievgias intensivas. Uradis curts u urizis n'èn betg en cas da reducir avunda la setgira da primavaira. Il surpassament dal scumond da far fieu vegn chastià cun ina multa fin 10'000 francs.
Ulteriuras infurmaziuns sco er la valitaziun da la situaziun actuala chattais Vus sut:
www.wald.gr.ch
Infurmaziuns:
- Ueli Eggenberger, uffizi forestal, tel. 081 257 38 58
Gremi: uffizi forestal
Funtauna: rg uffizi forestal