Per la fin da l'onn 2010 aveva il chantun Grischun 192'621 abitantas ed abitants permanents. Quai resorta dals resultats da la nova dumbraziun STATPOP, ils quals stattan a disposiziun per l'emprima giada.
La nova dumbraziun STATPOP sa basa sin in'evaluaziun dals registers da l'entira Svizra ed è ina part da las statisticas dal nov sistem da dumbraziun dal pievel. Diversas mancanzas da la dumbraziun veglia ESPOP han pudì vegnir eliminadas tras la nova dumbraziun. Uschia stattan ussa a disposiziun mintga onn per l'entira Svizra infurmaziuns da basa unitaras e cumparegliablas davart la populaziun.
Anc adina in lev augment da la populaziun
Tras ina nova definiziun da la noziun da la populaziun residenta permanenta (en consideraziun vegnan da nov er persunas en il process d'asil cun ina durada totala da la dimora d'almain 12 mais) sco er tras la modificaziun da la metodica da dumbraziun resultan correcturas statisticas. Resguardond questas restricziuns è la populaziun residenta permanenta dal Grischun s'augmentada l'onn passà per 0.4% (Svizra: 1.0%). Bundant 41% da la populaziun residenta permanenta dal Grischun abita en la regiun dal Grischun dal nord.
Populaziun residenta permanenta ils 31 da december 2010 tenor regiuns:
Funtauna: STATPOP 2010, UST
Populaziun en media pli veglia en il Grischun
Tras STATPOP stattan ussa er a disposiziun mintga onn datas detagliadas per tut las corporaziuns territorialas davart la repartiziun da la populaziun tenor vegliadetgna sco er davart la structura dal stadi civil da la populaziun. Cumpareglià cun la Svizra è cunzunt la populaziun pli veglia represchentada proporziunalmain pli fitg en il Grischun.
Structura da vegliadetgna da la populaziun residenta permanenta dal Grischun e da la Svizra per la fin da l'onn 2010, quotas en %:
Funtauna: STATPOP 2010, UST
La quota da la populaziun residenta estra crescha vinavant
32'104 persunas u 16.7% da tut las abitantas e da tut ils abitants permanents en il Grischun han ina naziunalitad estra. Questa quota è danovamain creschida. Las quotas las pli grondas vi da la populaziun residenta estra han er vinavant ils Tudestgs (24.1%), ils Portugais (23.6%) ed ils Talians (17.3%).
Adina dapli Grischunas e Grischuns vivan en vischnancas pli grondas
Passa 70% da tut las vischnancas grischunas avevan main che 1000 abitantas ed abitants l'onn 2010; en questas vischnancas vivan tut en tut anc 22.4% da la populaziun residenta permanenta. Er pervia da las fusiuns da vischnancas dals ultims onns abitan adina dapli persunas en vischnancas pli grondas.
Saldo da las naschientschas levamain negativ
L'onn 2010 èn vegnidas dumbradas 1'602 naschientschas vivas en il Grischun, 17 pli pauc che l'onn precedent. Cunquai ch'il dumber da mortoris è sa reducì cleramain a 1'608, n'è il saldo da las naschientschas (-6) betg uschè negativ sco durant ils onns precedents. Plinavant èn vegnidas serradas l'onn passà 930 lètgs e vegnids registrads 415 divorzis.
Resultats detagliads da la nova dumbraziun da la populaziun stattan a disposiziun sin la pagina d'internet da l'uffizi per economia e turissem sut
www.awt.gr.ch/statistik. Resultats detagliads davart il moviment e davart la migraziun da la populaziun l'onn 2010 tenor territoris sco er ulteriuras analisas suondan en il decurs da l'atun.
Infurmaziuns:
Patrick Casanova, uffizi per economia e turissem dal Grischun, tel. 081 257 23 74
Gremi: uffizi per economia e turissem
Funtauna: rg uffizi per economia e turissem