Cun duas ulteriuras bibliotecas collia il currier da velo ussa totalmain set lieus.

Dapi il matg 2010 collia in currier da velo da glindesdi fin venderdi las bibliotecas dal center da furmaziun per la sanadad ed ils fatgs socials, da la scola auta da tecnica ed economia, da la scola auta da pedagogia, da la scola auta teologica e da la biblioteca chantunala a Cuira. Per il 1. da settember 2011 è quest servetsch vegnì extendì sin las bibliotecas da la scola chantunala grischuna e da la scola professiunala artisanala Cuira. Tuttas duas bibliotecas emprestan gratuitamain lur titels ad utilisadras ed ad utilisaders interns ed externs.

Las utilisadras ed ils utilisaders ch'èn inscrits en las bibliotecas participantas han la pussaivladad da laschar purtar gratuitamain medias en la biblioteca da lur giavisch ubain da restituir medias en lur proxima biblioteca. Valair valan ils urdens d'utilisaziun da las bibliotecas respectivas. Ulteriuras infurmaziuns en chaussa survegnis Vus da Vossa biblioteca.

Il servetsch descrit è vegnì stgaffì en il rom dal project chantunal da promoziun "Bibliotecas da Cuira sco sistem coordinà". La gruppa centrala da la cooperaziun cun il focus sin bibliotecas da direcziun scientifica sa cumpona actualmain da las bibliotecas dal center da furmaziun per la sanadad ed ils fatgs socials, da la scola auta da tecnica ed economia, da la biblioteca chantunala, da la scola auta da pedagogia e da la scola auta teologica. Dirigida vegn la cooperaziun da la biblioteca chantunala.


Infurmaziuns:
Christina Bieber, manadra scientifica dal project, biblioteca chantunala dal Grischun, tel. 081 257 28 60


Gremi: biblioteca chantunala dal Grischun
Funtauna: rg biblioteca chantunala dal Grischun