La regenza grischuna gratulescha cordialmain ad Eveline Widmer-Schlumpf per la reelecziun odierna en il cussegl federal e per l'elecziun sco presidenta da la confederaziun per l'onn 2012. Ils 22 da december 2011 ha lieu il bainvegni uffizial en il Grischun.

Eveline Widmer-Schlumpf è vegnida confermada oz da l'assamblea federala plenara sco commembra da la regenza naziunala ed elegida sco presidenta da la confederaziun per l'onn 2012. La regenza grischuna sa legra da questa gronda onur ch'è vegnida demussada qua tras ad Eveline Widmer-Schlumpf ed er al Grischun sco ses chantun d'origin. Ultra da quai gratulescha la regenza a Corina Casanova per sia reelecziun sco chanceliera federala.

Ina festa cun trais staziuns
Il chantun Grischun fa gievgia, ils 22 da december 2011, in bainvegni uffizial a la presidenta da la confederaziun Eveline Widmer-Schlumpf. Las festivitads han lieu a Maiavilla, a Cuira ed a Favugn.

Il tren spezial da Berna arriva a las 14.05 a Maiavilla, nua ch'èn planisads in'emprima pitschna fermada ed in bainvegni tras il president da la citad Max Leuener. Alura cuntinuescha il tren per arrivar a las 14.47 a la staziun da Cuira. Accumpagnà da la musica da la citad da Cuira datti in cortegi tras la citad fin a l'auditori da la banca chantunala grischuna (BCG). Là ha alura lieu l'act festiv uffizial cun giasts envidads da Berna e dal Grischun. I vegnan a salvar in pled la presidenta da la confederaziun Micheline Calmy-Rey, la vicepresidenta da la regenza grischuna Barbara Janom Steiner sco er Eveline Widmer-Schlumpf. Beneventads vegnan ils giasts dal president da la citad da Cuira Christian Boner. Per l'accumpagnament musical da l'act festiv procura il chor grischun da giuventetgna.

Suenter l'act festiv uffizial en l'auditori da la BCG sa renda la delegaziun a Favugn, la vischnanca burgaisa dad Eveline Widmer-Schlumpf, nua ch'i dat – a partir da las 17.30 – in apero sin la plazza davant la sala da gimnastica. La sairada uffiziala per ils giasts envidads vegn alura festivada en la sala da gimnastica. La presidenta communala Lucrezia Furrer vegn a beneventar ils giasts. Ulteriurs pleds salvan il president dal cussegl grond Ueli Bleiker sco er Eveline Widmer-Schlumpf. Per il rom musical da l'occurrenza da la sairada procuran differentas furmaziuns da Favugn. La notg alura turna il tren spezial puspè a Berna.

La populaziun è envidada cordialmain da far part dal bainvegni a Maiavilla e da l'apero a Favugn. Tgi che vul po er sa participar al cortegi a Cuira che maina da la staziun a l'auditori da la BCG. A Favugn vegnan las festivitads projectadas supplementarmain sin ina taila gronda che sa chatta en l'aula vischina, ed ellas pon vegnir persequitadas uschia da la populaziun che giauda là l'ustaria da festa e suenter in program accumpagnant.


Infurmaziuns:
chancelier dr. Claudio Riesen, chanzlia chantunala dal Grischun, tel. 081 257 22 21


Gremi: regenza
Funtauna: rg chanzlia chantunala dal Grischun