Navigation

Inhaltsbereich

  • Erste Mitteilung
  • Neuen Beitrag einfügen
Gievgia, ils 22 da december 2011, beneventa il Grischun la presidenta da la confederaziun Eveline Widmer-Schlumpf. La populaziun è envidada cordialmain da sa participar a las festivitads.

Gist en trais lieus vegn la presidenta da la confederaziun da l'onn 2012 festivada gievgia en il Grischun. Eveline Widmer-Schlumpf vegn beneventada uffizialmain al cunfin chantunal a Maiavilla, en la chapitala a Cuira sco er en sia vischnanca burgaisa a Favugn. A Favugn ha lieu la saira ina festa per giasts envidads dal Grischun e da Berna.

Mesemna, ils 14 da december 2011, è Eveline Widmer-Schlumpf vegnida confermada da l'assamblea federala plenara sco commembra da la regenza naziunala ed elegida sco presidenta da la confederaziun per l'onn 2012. Per appreziar e per undrar questa elecziun prepara il chantun in bainvegni per la nova presidenta da la confederaziun en il Grischun. La populaziun è envidada cordialmain da sa participar gievgia sco suonda a las festivitads: A las 14.05 ferma il tren spezial da Berna a Maiavilla. A la staziun ha lieu in emprim bainvegni uffizial. A las 14.47 arriva il tren a la staziun da Cuira. Suenter pon ins persequitar in cortegi da la raspada da festa fin a l'AUDITORI da la banca chantunala grischuna (BCG). Il cortegi vegn accumpagnà da la musica da la citad da Cuira. La ruta maina da la plazza da la staziun da Cuira via la Bahnhofstrasse, il Postplatz e la Gäuggelistrasse fin a l'AUDITORI da la BCG a l'Engadinerstrasse. Là ha lieu l'act festiv uffizial cun ils giasts envidads da Berna e dal Grischun. Suenter l'act festiv sa renda la raspada a Favugn, nua ch'i dat a partir da las 17.30 in apero cun la populaziun sin la plazza avant la sala da gimnastica. La sairada uffiziala per ils giasts envidads vegn festivada a partir da las 18.10 en la sala da gimnastica. Per il rom musical da l'occurrenza procuran differentas furmaziuns da Favugn. Las festivitads per ils giasts envidads vegnan transmessas per la populaziun en l'aula vischina sin ina tenda gronda. La vischnanca procura per l'ustaria da festa e per il program accumpagnant.


Infurmaziuns:
chancelier dr. Claudio Riesen, chanzlia chantunala dal Grischun, tel. 081 257 22 21


Gremi: Chanzlia chantunala dal Grischun
Funtauna: rg chanzlia chantunala dal Grischun
Neuer Artikel