Cuntegn da la pagina

Communicaziun da la regenza dals 12 da schaner 2012

  • Erste Mitteilung
  • Neuen Beitrag einfügen

En sia emprima sesida da l'onn 2012 ha la regenza deliberà il rapport davart il program da construcziun da vias 2013 fin 2016. Tut en tut èn previs 712 milliuns francs per construir e per mantegnair las vias.

Rapport davart il program da construcziun da vias 2013 fin 2016
A chaschun da la sessiun dal cussegl grond dal zercladur 2008 è vegnì preschentà al parlament grischun per l'emprima giada in rapport davart il program da construcziun da vias. Quel è vegnì giuditgà sco fitg prezius e percepì en moda positiva. Differentas deputadas e differents deputads sco er la cumissiun da gestiun han proponì d'elavurar in program consecutiv en il rom dal program da la regenza e dal plan da finanzas e da preschentar quel al cussegl grond.

In rapport respectiv davart il program da construcziun da vias 2013 fin 2016 è ussa vegnì deliberà da la regenza grischuna. Quel vegn preschentà al cussegl grond en la sessiun d'avrigl 2012 per prender enconuschientscha. Il rapport cuntegna ina retrospectiva sin il program actual che vala anc fin la fin da l'onn 2012 sco er indicaziuns davart las midadas ch'èn vegnidas fatgas ils ultims trais onns en il sectur da las vias e dilucidescha in pèr aspects spezials.
Il program da construcziun da vias nov sco tal sa basa sin il program vertent en quai che concerna la direcziun strategica e las ponderaziuns davart las priorisaziuns. Concretamain prevesa il chantun investiziuns da 382 milliuns francs per ils proxims quatter onns per construir da nov e per renovar las vias principalas e las vias da colliaziun. Cun in sguard sin la realisaziun dal sviament da Silvaplauna èn quai 34 milliuns francs dapli che en il program current.
En cas da la rait da vias actuala exista anc adina in basegn da reparaziun creschent. Il motiv è che bleras vias èn vegnidas construidas en in temp, nua ch'il traffic n'era anc betg uschè grond e nua ch'ils camiuns n'eran betg mo pli ligers, mabain avevan er dimensiuns pli pitschnas. Per la proxima perioda da program èn perquai previs 330 milliuns francs per il mantegniment architectonic da las vias, quai èn 38 milliuns francs dapli ch'enfin ussa.

Cun il nov program da construcziun da vias da quatter onns che sa basa sin la planisaziun da finanzas preschenta la regenza ina basa per las lavurs da l'uffizi da construcziun bassa ch'è uschè fidada ed uschè transparenta sco pussaivel.


Da vischnancas e da regiuns

  • Riom-Parsonz: La revisiun parziala da la planisaziun locala da la vischnanca da Riom-Parsonz dals 30 da mars 2011 vegn approvada. Ina part integrala da la revisiun è l'adattaziun dal plan general d'avertura 1:10'000 per la construcziun d'in lai d'accumulaziun nov en il territori da Cartas. 
  • Razén: La revisiun parziala da la planisaziun locala ch'è vegnida concludida da la vischnanca da Razén ils 6 d'october 2011 e che cumpiglia ina revisiun parziala da la lescha da construcziun, vegn approvada.

 
Contribuziuns chantunalas a differentas instituziuns

  • Servetschs psichiatrics dal Grischun: La contribuziun a l'instituziun responsabla dals servetschs psichiatrics dal Grischun importa 478'111 francs per l'onn 2010. 
  • Chasa per dunnas dal Grischun: Cun la chasa per dunnas dal Grischun vegn fatg in nov contract da prestaziuns che vala fin la fin da l'onn 2015.


Projects da vias
La regenza ha approvà 622'000 francs per lavurs da construcziun sin ils suandants trajects:
- via dal Güglia/da Malögia, sviament da Silvaplauna: lavurs d'impressari e da francaziun per l'emprima exchavaziun a Pignia


Gremi: regenza
Funtauna: rg chanzlia chantunala dal Grischun

Neuer Artikel