Cuntegn da la pagina

La mesiraziun uffiziala da la Svizra envida a la festa da giubileum

  • Erste Mitteilung
  • Neuen Beitrag einfügen
La mesiraziun uffiziala da la Svizra cumplenescha 100 onns. Il giubileum cumenza mesemna, ils 9 da matg 2012, sin la plazza federala a Berna. Festegià vegni però er al "Di da la mesiraziun uffiziala da la Svizra": sut il motto "center" han lieu sonda, ils 12 da matg 2012, activitads en tut ils chantuns.

Dapi l'onn 1912 è la mesiraziun uffiziala ina pitga purtanta dal sistem da dretg svizzer; ella definescha ils cunfins e documentescha il lieu d'edifizis, vias e sendas, ma er il curs dad auas ed ils urs dal guaud. Cun la protecziun da la proprietad funsila gida ella a contribuir a la segirezza giuridica ed al bainstar. Purtada vegn la mesiraziun uffiziala da la confederaziun, dals chantuns e da las vischnancas. Realisada vegn ella per gronda part da persunas privatas, per part er d'uffizis da mesiraziun communals.

Program varià sin la plazza federala
L'onn 2012 festivescha la mesiraziun uffiziala da la Svizra ses giubileum da 100 onns. Las festivitads vegnan lantschadas mesemna, ils 9 da matg 2012. Sin la plazza federala a Berna èn prontas bleras attractivitads per la publicitad. L'anteriur cusseglier federal Samuel Schmid vegn a preschentar il motiv da la marca postala speziala. Cun il puzzle il pli grond da la Svizra mussa la mesiraziun uffiziala sia vart umoristica. El vegn fatg da las emprendistas e dals emprendists da geomatica da tut la Svizra. Spezialistas e spezialists infurmeschan davart la mesiraziun uffiziala e respundan dumondas. Tgi che ha mirveglias po tranter auter dar sez ina giada in'egliada tras in tachimeter e mesirar la plazza federala cun GPS.

In di entir en il center
En moda speziala vegn alura festegià il giubileum al "Di da la mesiraziun uffiziala da la Svizra" sonda, ils 12 da matg 2012. En tut ils chantuns vegnan purschidas activitads davart il tema "center" – per exempel ir e star sin il center geografic dal chantun.

En il chantun Grischun vegn mussada dals 12 als 19 da matg 2012 in'exposiziun speziala a la Higa, la fiera da primavaira a Cuira. Purtada vegn questa exposiziun speziala da l'uniun d'inschigneras geometras e d'inschigners geometers dal Grischun (IGGR), da la federaziun spezialisada geosuisse, secziun dal Grischun, e dal chantun Grischun. Ella dat a las burgaisas ed als burgais ina invista en la mesiraziun uffiziala. Als stans infurmeschan spezialistas e spezialists davart la lavur en la mesiraziun uffiziala e davart la professiun sco tala.
Il center geografic dal chantun Grischun è il Crap Furò che sa chatta en il Parc Ela e che po vegnir cuntanschì sin la senda dals piuniers.

Tut las infurmaziuns concernent il giubileum da 100 onns da la mesiraziun uffiziala da la Svizra chattais Vus en l'internet sut www.cadastre.ch/2012.


Remartga:
Maletgs per duvrar libramain: www.cadastre.ch/2012.  


Infurmaziuns:
- Aurelio Casanova, manader da l'uffizi d'agricultura e da geoinfurmaziun, tel. 081 257 24 31, e-mail aurelio.casanova@alg.gr.ch  
- Franco Bontognali, manader da la mesiraziun, tel. 081 257 24 61, e-mail franco.bontognali@alg.gr.ch  


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun
Neuer Artikel