La regenza grischuna ha approvà pliras cunvegnas da program fatgas cun la confederaziun. Plinavant è ella s'occupada en sia ultima sesida da differentas fatschentas or da las vischnancas e da divers projects da vias.

Approvà cunvegnas da program per parcs e per projects grischuns da parcs
La regenza grischuna ha approvà pliras cunvegnas da program per ils onns 2012 fin 2015 tranter l'uffizi federal d'ambient ed il chantun Grischun. Quatter cunvegnas èn vegnidas fatgas en il champ da parcs d'impurtanza naziunala. Questas cunvegnas reglan las incumbensas communablas tranter la confederaziun ed il chantun en connex cun ils parcs natirals regiunals gia existents Parc Ela e Biosfera Val Müstair sco er cun ils projects per in parc naziunal Adula e per in parc natiral regiunal Beverin.
Ulteriuras cunvegnas da program approvadas pertutgan ils secturs ovras da protecziun en il guaud, guaud da protecziun, biodiversitad en il guaud ed economia forestala sco er natira e cuntrada.

Novas reglas per tegnair chavals en la zona d'agricultura
En ina consultaziun a la confederaziun prenda la regenza grischuna posiziun davart il tegnair chavals en la zona d'agricultura. Il motiv per quai è ina iniziativa parlamentara che pretenda da schluccar las disposiziuns che reglan il tegnair chavals da sport e da temp liber en la zona d'agricultura. La regenza beneventa la direcziun da l'iniziativa parlamentara, perquai che quella correspunda a la pratica executiva actuala e tegna er quint en moda adequata dals interess ch'èn sa midads en il Grischun envers la tratga moderna da chavals.


Da vischnancas e da regiuns

• Schiers: La planisaziun d'utilisaziun da la vischnanca da Schiers dals 24 da zercladur 2011 cun in plan da zonas e plan general da furmaziun 1:1'000 "deposit da material", ch'è vegnida fatga per il project d'installar e da manar ina deponia da material en il territori "Über der Landquart", vegn approvada. A medem temp vegn dada la permissiun per la runcada permanenta e temporara da l'areal da guaud per realisar la deponia. 
• Tavau: La revisiun parziala da la planisaziun locala da la vischnanca da Tavau dals 30 da zercladur 2011 vegn approvada. La revisiun cuntegna plans generals d'avertura per il provediment d'aua e per l'allontanament d'aua persa da Tavau. 
• Fideris: La revisiun parziala da la lescha da construcziun sco er il plan da zonas 1:1'000, revisiun parziala "Madinis" che la vischnanca da Fideris ha concludì ils 27 d'october 2011 vegnan approvads. 
• Grüsch: La revisiun parziala da la planisaziun locala, concludida da la vischnanca da Grüsch ils 23 da zercladur 2011, vegn approvada. 
• Braggio: La revisiun parziala da la constituziun communala da la vischnanca da Braggio dals 29 da schaner 2012 vegn approvada. 
• Medel/Lucmagn: La revisiun parziala da la constituziun communala da la vischnanca da Medel/Lucmagn dals 29 da schaner 2012 vegn approvada. 
• Val S. Pieder: La constituziun da la vischnanca da Val S. Pieder dals 29 da schaner 2012 vegn approvada. 
• Cuira: A la citad da Cuira vegn garantida ina contribuziun chantunala da construcziun da 218'800 francs per renovar la chasa da scola dal stgalim superiur Quader.

Projects da vias
A chaschun da sia ultima sesida ha la regenza approvà ils suandants projects per correcziuns da vias:
- Rabius e Sumvitg: midada dal project d'exposiziun per la correcziun da la via sursilvana, traject da Rabius fin Sumvitg (kilometers 43,03 fin 44,38)
- Murmarera e Beiva: correcziun da la via dal Güglia, traject Giustia (kilometers 53,60 fin 53,85)
- Churwalden: midada dal project d'exposiziun per la correcziun da la via dal Güglia, traject da Stettli fin Parpan (kilometers 12,90 fin 13,90)
- Duin: project d'exposiziun per la correcziun da la via da Val S. Pieder, traject da Mulin da Pitasch fin Peiden Bogn (kilometers 5,73 fin 7,19)

Plinavant ha la regenza approvà totalmain 12'090'000 francs per lavurs da construcziun sin ils suandants trajects:
- via naziunala A28: lavurs d'impressari, sviament da Küblis, construcziuns artifizialas a Prada
- via dal Güglia: lavurs d'impressari e da cuvrida, sviament da Silvaplauna, Piz Sura – rundella Piz


Gremi: regenza
Funtauna: rg chanzlia chantunala dal Grischun