La regenza grischuna ha approvà il sviament al vest da Glion.

Approvà il sviament al vest da Glion
La regenza ha acceptà da realisar in sviament al vest da la citad da Glion. Sin fundament da las protestas e da las posiziuns ch'èn entradas durant l'exposiziun publica dal project l'avust / il settember 2011 è il project anc vegnì adattà en tscherts puncts.
Il tschancun central dal project è il trassé nov da la via lumneziana. Quest tschancun cumenza tar la rundella Glion vest e cumpiglia en spezial ina punt da la via da 270 meters lunghezza che percurra per lung da la punt da la viafier e che traversa il Rain, la lingia da viafier sco er il territori industrial California dad omaduas varts da la via Santeri. A l'autezza da Runcaleida traversa la via in prà e sbucca en la nova rundella da la via lumneziana. La via cuntinuescha en direcziun orientala fin a la storta andetga tar l'uschenumnà tschaler da glatsch e sa collia en la storta a dretga a Muschna cun la via lumneziana existenta.
Il sviament permetta da distgargiar Glion considerablamain dal traffic da transit. La quantitad da traffic sin las vias da transit actualas vegn a sa reducir per bunamain la mesadad. Er las colonnas tar il passadi da viafier vegnan a sa sminuir. Ultra da quai s'augmenta la segirezza dal traffic. Il sviament custa circa 26 milliuns francs. I vegn quintà cun in temp da construcziun da 4 fin 5 onns.

Circa 10 milliuns per la reparaziun da vias da guaud
Per la reparaziun da vias da guaud impunda il chantun 10'653'000 francs. La regenza ha approvà in project collectiv "Reparaziun d'averturas 2012" ch'è vegnì fatg da l'uffizi da guaud e privels da la natira per incumbensa da differentas vischnancas. La finamira da quest project è quella da mantegnair ils stabiliments forestals d'avertura existents e da meglierar il traffic sin quels. Il project collectiv cuntegna 95 objects da reparaziun. Da quest project na fan expressivamain betg part amplificaziuns e construcziuns novas da vias da guaud u da vias da maschinas sco er il mantegniment current da questas vias.


Da vischnancas e da regiuns

• Donat: La revisiun parziala da la planisaziun locala, concludida da la vischnanca da Donat ils 23 da november 2011, vegn approvada. La planisaziun d'utilisaziun revedida per il territori Custanzas ha la finamira da construir in nov lavuratori forestal. 
• Flearda: La revisiun parziala da la planisaziun locala da la vischnanca da Flearda dals 2 da december 2011 vegn approvada. 
• Mut: Vi da la meglieraziun generala da la vischnanca da Mut vegn garantida – cun resalva d'ina contribuziun federala da 50 pertschient als custs imputabels – ina contribuziun chantunala da maximalmain 3'427'550 francs. 
• Claustra-Serneus: Il project "Avertura Gruobenwald" che l'uffizi da guaud e privels da la natira ha inoltrà per incumbensa da la vischnanca da Claustra-Serneus vegn approvà. Als custs vegn garantida ina contribuziun chantunala da maximalmain 374'000 francs. 
• Arosa: Il project dal rempar dals auals da Tomeli e da Gender da la vischnanca dad Arosa vegn approvà. Als custs vegn garantida ina contribuziun chantunala da maximalmain 182'600 francs. 
• Cuira: Vi da la renovaziun generala da la chasa da scola Quader a Cuira vegn garantida – per il sectur da la tgira da monuments – ina contribuziun da maximalmain 665'000 francs.

Projects da vias
La regenza ha approvà 6'380'000 francs per lavurs da construcziun sin ils suandants trajects:
- via sursilvana H19: lavurs d'impressari e da cuvrida, Punt Russein
- via da St. Antönien: lavurs d'impressari, Pany – St. Antönien Plaz, punt a spunda Schaniela 4-6
- via d'Avras: lavurs d'impressari e da cuvrida, Calantgil – Cröt, punt Val digl Uors e mir da sustegn
Plinavant ha la regenza approvà il suandant project da vias:
- via tudestga H3: correcziun da la via tar il spartavias Mastrils – fin da la via chantunala (kilometers 0.24 fin 0.76).


Gremi: regenza
Funtauna: rg chanzlia chantunala dal Grischun