Per ses engaschament exemplaric en connex cun l'iniziaziun e cun la realisaziun d'ina revitalisaziun da las auas ad Andeer è la societad da pestgadras e da pestgaders da la Val Schons vegnida undrada cun il premi da promoziun da la pestga 2012.

A chaschun da la radunanza da delegadas e da delegads da la federaziun chantunala da las pestgadras e dals pestgaders grischuns vegn surdà mintga onn il premi da promoziun da la pestga grischuna. Uschia er l'ultima sonda a Scuol. En preschientscha da cusseglier guvernativ Mario Cavigelli ha il president chantunal Ruedi Gerhard pudì surdar il premi da promoziun da quest onn da 3000 francs a la societad da pestgadras e da pestgaders da la Val Schons.

La societad da pestgadras e da pestgaders da la Val Schons è vegnida undrada per ses engaschament tar la lantschada, la planisaziun e la realisaziun dal project da revitalisaziun en l'aual da mulin dad Andeer. La societad da pestgadras e da pestgaders da la Val Schons ha mussà en moda exemplarica che er societads pitschnas pon, sche l'engaschament necessari è avant maun, cuntanscher bler per meglierar las auas da peschs.

Il premi da promoziun da la pestga grischuna, lantschà l'onn 2008 da la federaziun chantunala da las pestgadras e dals pestgaders grischuns e da l'uffizi da chatscha e pestga dal Grischun, undrescha prestaziuns extraordinarias a favur da la pestga grischuna. Cun quest premi duain vegnir undrads engaschaments prezius en ils suandants secturs: meglierament u mantegniment da la flora e da la fauna aquatica, scolaziun da pestgadras e da pestgaders giuvens u lavur da publicitad che stat en connex cun quests dus temas. Ultra da quai duai il premi da promoziun dar in impuls da s'engaschar en moda constructiva ed innovativa per ils fatgs da la pestga.


Infurmaziuns:
Marcel Michel, biolog da peschs, uffizi da chatscha e pestga, tel. 081 257 38 94


Gremi: uffizi da chatscha e pestga
Funtauna: rg uffizi da chatscha e pestga dal Grischun