Ina delegaziun dal cussegl grond dal chantun Berna ha visità oz durant la sessiun d'avrigl 2012 las collegas ed ils collegas dal chantun Grischun a Cuira.
La delegaziun da 14 persunas dal chantun Berna è vegnida timunada dal president dal cussegl grond Beat Giauque. El è vegnì accumpagnà tranter auter da la vicepresidenta dal cussegl grond Therese Rufer-Wüthrich e dal vicepresident dal cussegl grond Bernhard Antener.
Ils giasts dal chantun Berna èn vegnids beneventads a Cuira dal president dal cussegl grond Ueli Bleiker e da la vicepresidenta dal cussegl grond Elita Florin-Caluori. Da vart dal Grischun èn sa participads a l'inscunter ultra da quai ils presidents da las fracziuns.
L'avantmezdi ha la delegaziun suandà las tractativas actualas en l'edifizi dal cussegl grond. Il suentermezdi ha ella giudì ina visita guidada tras la citad veglia da Cuira. La visita da la delegaziun ha servì en emprima lingia al barat d'experientschas sco er a la tgira da las relaziuns amicablas.
Fotografias:
Il president dal cussegl grond dal chantun Berna Beat Giauque ed il president dal cussegl grond dal chantun Grischun Ueli Bleiker (a sanestra) en la sala dal cussegl grond a Cuira.
Las duas delegaziuns cun il president dal cussegl grond Beat Giauque e cun il president dal cussegl grond Ueli Bleiker (amez) davant l'edifizi dal cussegl grond a Cuira.
Gremi: chanzlia chantunala dal Grischun
Funtauna: rg chanzlia chantunala dal Grischun