Cuntegn da la pagina

Communicaziun da la regenza dals 19 d'avrigl 2012

  • Erste Mitteilung
  • Neuen Beitrag einfügen
La regenza grischuna prenda posiziun davart la legislaziun da posta e davart l'iniziativa per ina posta ferma. Plinavant ha ella prendì enconuschientscha da la petiziun "Gimnasi – roms d'accent spagnol e franzos senza latin obligatoric". Ultra da quai vegn adattada la valaivladad da las permissiuns spezialas per vehichels da pista.

La regenza beneventa las disposiziuns executivas tar la lescha da posta
En ina consultaziun a la confederaziun prenda la regenza grischuna posiziun davart las disposiziuns executivas tar la lescha da posta (ordinaziun da posta). Sa basond sin la tenuta da la conferenza da las directuras e dals directurs chantunals da l'economia publica (CDE) constatescha la regenza che la legislaziun da posta revedida (lescha da posta, lescha davart l'organisaziun da la posta sco er ordinaziun da posta) tractia las dumondas las pli impurtantas concernent il service public e determineschia en ina moda raschunaivla il standard cun legitimaziun politica per ils proxims onns. Ils aspects dal service public, pia il provediment da basa cun servetschs da posta en tut las regiuns, giogan ina rolla centrala. La regenza sustegna er la tenuta dal cussegl federal e dal parlament federal cunzunt areguard mantegnair il monopol restant per la posta per la spediziun da chartas fin a 50 grams ed areguard la renunzia da fundar ina banca postala. Per cumplettar constatescha la regenza en sia resposta ch'ella refuseschia l'iniziativa dal pievel "per ina posta ferma" per ponderaziuns da princip. La dumonda dal pievel pretenda in standard che va memia lunsch ed annullescha pass impurtants ch'èn vegnids fatgs per flexibilisar la posta e per la surdar dapli libertad d'interpresa. Ella impedescha per exempel da furnir ils servetschs da posta en moda flexibla, sco ch'igl è necessari oz en las regiuns periferas.

Da la petiziun "Gimnasi – roms d'accent spagnol e franzos senza latin obligatoric" èsi vegnì prendì enconuschientscha
La regenza grischuna ha prendì enconuschientscha da la petiziun "Gimnasi – roms d'accent spagnol e franzos senza latin obligatoric". Questa petiziun era vegnida inoltrada ils 13 da mars 2012 d'ina delegaziun da las classas gimnasialas cun passa 2000 suttascripziuns.
En sia resposta menziunescha la regenza grischuna da vulair meglierar la posiziun dal rom d'instrucziun latin cun in experiment da scola, perquai che quest rom saja vegnì indeblì fermamain l'onn 1995 en connex cun la revisiun da l'ordinaziun dal cussegl federal davart ils attestats da maturitad. Perquai duai cumenzar a partir da l'onn da scola 2012/13 in experiment da tschintg onns ch'è vegnì permess da la cumissiun svizra da maturitad (CSM). L'evaluaziun finala vegn a mussar, sche la cumbinaziun obligatorica dal rom d'accent spagnol u franzos cun il rom cumplementar latin vegn a sa cumprovar sco mesira per augmentar la qualitad da la scolaziun al gimnasi.

Las permissiuns per ils vehichels da pista valan da nov trais onns
La regenza grischuna ha revedì parzialmain l'ordinaziun per incassar taxas e custs dals possessurs da vehichels a motor e da velos. La midada la pli impurtanta pertutga la valaivladad da las permissiuns spezialas per ils vehichels da pista. Sin ina dumonda inoltrada al cussegl grond durant la sessiun d'october 2011 è la regenza sa declerada pronta da prolungar la valaivladad d'in onn a trais onns. Ulteriurs puncts da la revisiun pertutgan adattaziuns a la terminologia actuala sco er al dretg federal e chantunal midà. La revisiun parziala entra en vigur il 1. da zercladur 2012.

Permess ils projects da las ovras electricas d'Engiadina SA
La regenza grischuna ha approvà cun cundiziuns la dumonda concernent la "Ovra electrica da dotaziun Pradella" ch'è vegnida inoltrada ils 3 d'october 2011 sco er il project da construcziun "Retrofit enchaschament da la Clemgia" ch'è vegnì inoltrà cun la dumonda dals 9 da november 2011.


Da vischnancas e da regiuns 
  • Castrisch: La revisiun parziala da la planisaziun locala da la vischnanca da Castrisch, concludida ils 25 d'october 2011, vegn approvada. La dumonda da runcar in areal da guaud da 1566 m2 cun l'intent d'engrondir la zona da mastergn "Isla" en il guaud public, territori da la vischnanca da Castrisch, vegn medemamain approvada da la regenza cun cundiziuns. 
  • Cazas: Il project d'exposiziun per la correcziun da la via da Ratitsch, traject da l'access da Ratitsch–Ratitsch, vegn approvada. 
  • Claustra-Serneus: La Aeujastrasse vegn abgiuditgada per il 1. da matg 2012 sco via chantunala da colliaziun e cedida a la vischnanca da Claustra-Serneus sco proprietad e per il mantegniment. 
  • Landquart: Il plan d'areal "plazza da la staziun sid" dals 9 da favrer 2012 vegn approvà. 
  • Razén/Cazas: Il project "H13 via taliana, traject Razén–Cazas, protecziun cunter crudada da crappa al Plattenwald" vegn approvà e sustegnì cun ina contribuziun da maximalmain 1'912'500 francs. 
  • Roveredo: La revisiun da la lescha da construcziun, deliberada ils 27 da november 2011, vegn approvada. 
  • Spleia: La revisiun parziala da la lescha da construcziun concernent la regulaziun da la quota d'emprimas abitaziuns, concludida ils 10 da november 2011, vegn approvada. 
  • Versomi: Il reglament ed il plan per las zonas da protecziun da las funtaunas dal provediment d'aua public da Versomi, relaschads da la suprastanza communala ils 14 da december 2011, vegnan approvads. 
  • Vignogn: Il project "Renovaziun da las vias champestras da la vischnanca da Vignogn" vegn approvà e subvenziunà cun ina contribuziun da maximalmain 125'760 francs.

Projects da vias
La regenza ha approvà 12'900'000 francs per lavurs da construcziun sin ils suandants trajects:
- via da Val S. Pieder: lavurs da cuvrida, Glion – Val S. Pieder incl. vias lateralas
- via da Siat: lavurs d'impressari, Rueun – Sareins Sut
- H27 via d'Engiadina: lavurs da cuvrida e d'impressari, sviament da Scuol
- H27 via d'Engiadina: lavurs da cuvrida entaifer il vitg da San Murezzan
- H27 via d'Engiadina: lavurs da cuvrida, Bever – La Punt
- H28 via dal pass dal Fuorn: lavurs da cuvrida, Tschierv – Chafarrers
- H28 via dal pass dal Fuorn: lavurs d'impressari, Zernez – Ova da Sagl
- via d'Andiast: lavurs d'impressari entaifer il vitg da Vuorz
- H29 via dal Bernina: lavurs da cuvrida, Palü Granda – La Rösa
- via da Lunden: lavurs d'impressari e da cuvrida, Eristobel – Terfals
- via da Val S. Pieder: lavurs d'impressari, Muglin da Pitasch – Peiden Bogn
- via da Fidaz: lavurs d'impressari entaifer il vitg da Fidaz


Gremi: regenza
Funtauna: rg chanzlia chantunala dal Grischun
Neuer Artikel