Cuntegn da la pagina

Mussar las schanzas da las energias regenerablas

  • Erste Mitteilung
  • Neuen Beitrag einfügen
Ils 3 e 4 da matg ha lieu a Son Gagl la dieta da la ARGE ALP davart il tema "Vias a la citad d'energia". Nov vischnancas dal Grischun, da Son Gagl, dal Tessin, da la Baviera, da Salzburg, dal Tirol dal Sid, dal Tirol, dal Trentino e dal Vorarlberg preschentan lur projects da success e mussan lur vias individualas a la citad d'energia.

En las Alps vegni producì energia tradiziunalmain cun laina e cun aua – novissimamain er cun il sulegl, cun la chalur da la terra e cun il vent. Las regiuns alpinas tiran numnadamain a niz pli intensivamain las schanzas economicas d'in futur cun energias effizientas e regenerablas.
La cuminanza da lavur da las regiuns alpinas (ARGE ALP) sa fatschenta perquai gia pli daditg cun il tema "energias regenerablas". Gia oz occupan bleras vischnancas dals pajais federativs, da las regiuns e dals chantuns da la ARGE ALP ils emprims rangs en il benchmarking dal "European Energy Award" (EEA). In quart da las vischnancas europeicas ch'èn vegnidas undradas da la EEA cun il premi d'aur èn vischnancas da la ARGE ALP. Questa posiziun excellenta duai vegnir extendida.

Chaussas exemplaricas da nov vischnancas
Il chantun Son Gagl, che presidiescha actualmain la ARGE ALP, ha tschernì per ses onn da presidi il tema "Las Alps: funtauna da l'energia regenerabla". En spezial duain vegnir renconuschids la rolla da las vischnancas sco er lur sforzs e lur prestaziuns. Ils 3 e 4 da matg 2012 envida il chantun Son Gagl perquai a la dieta davart il tema "Vias a la citad d'energia" che ha lieu en las localitads dal tribunal administrativ federal a Son Gagl. Tut ils pajais federativs, tut las regiuns e tut ils chantuns da la ARGE ALP èn represchentads cun ina vischnanca che ha realisà chaussas extraordinarias en il sectur da las energias regenerablas e da l'effizienza energetica.

Las nov vischnancas – quai èn Landquart (Grischun), Buchs (Son Gagl), Mendrisio (Tessin), Wildpoldsried (Baviera), Weissbach sper Lofer (Salzburg), Toblach (Tirol dal Sid), Virgen (Tirol), Trento (Trentino) e Wolfurt (Vorarlberg) – preschentan a chaschun da la dieta lur projects da success, lur strategias e las vias ch'ellas han tschernì per arrivar a la citad d'energia. Uschia duain vegnir mussadas las schanzas multifaras en il sectur tecnic, economic, turistic, ecologic e cultural che las energias regenerablas porschan al territori alpin. Las vischnancas pon barattar strategias da success e sustegnair ed animar autras vischnancas sin questa via. Er ils posts spezialisads per dumondas d'energia dals commembers da la ARGE ALP sa participeschan a la dieta.

La cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan nov pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid e Trient. Presidiada vegn la ARGE ALP mintgamai per in onn d'in da ses commembers. La sedia dal secretariat è a Puntina. Il territori da la ARGE ALP cumpiglia ina surfatscha da 118'504 kilometers quadrat ed è il dachasa da 16 milliuns persunas. Ulteriuras infurmaziuns sut: www.argealp.org.  


Infurmaziun per las medias:
Las collavuraturas ed ils collavuraturs da las medias èn envidads a la dieta da la ARGE ALP davart il tema "Vias a la citad d'energia" che ha lieu ils 3 e 4 da matg 2012 a Son Gagl. Il chantun Son Gagl paja ina indemnisaziun per ils custs da viadi e surpiglia ils custs da pernottaziun e da las tschaveras. Persunas interessadas vegnan supplitgadas da s'annunziar tar la chanzlia chantunala dal Grischun, tel. 081 257 22 47 u e-mail luzi.buerkli@staka.gr.ch.


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel