Cuntegn da la pagina

Ils gieus da stad da la ARGE ALP cumenzan cun in turnier da ballape a Cuira

  • Erste Mitteilung
  • Neuen Beitrag einfügen
Dals 17 fin ils 20 da matg 2012 ha lieu a Cuira in turnier da ballape da la cuminanza da lavur da las regiuns alpinas (ARGE ALP). Il turnier furma l'avertura dals gieus da stad 2012 da la ARGE ALP. Otg equipas U15 da trais pajais s'inscuntran a Cuira.

Il sport ha ina lunga tradiziun en la ARGE ALP. Als gieus da stad e d'enviern sa mesiran ils nov commembers da la ARGE ALP, vul dir ils pajais federativs, las regiuns ed ils chantuns, mintga onn en nov disciplinas da sport specificas alpinas. Manà vegn il project "ARGE ALP sport" dal chantun Grischun. Il project ha la finamira da sviluppar en moda persistenta las disciplinas da sport specificas alpinas las pli impurtantas, da sviluppar il sport da persunas cun impediments en il territori alpin sco er da promover il moviment en la ARGE ALP. Las concurrenzas han lieu en moda unitara, dentant en furma decentrala en tut ils pajais federativs, en tut las regiuns ed en tut ils chantuns da la ARGE ALP.

Suenter ils dus gieus d'enviern, numnadamain hockey sin glatsch en il Tirol dal Sid e patinadi artistic a Trentino, organisescha ussa l'associaziun grischuna da ballape per incumbensa da l'uffizi chantunal per la scola populara ed il sport il turnier da ballape 2012 da la ARGE ALP en il Grischun. Da venderdi, ils 18 da matg, fin dumengia, ils 20 da matg 2012, giogan equipas dal Grischun, da Son Gagl, dal Tessin, dal Vorarlberg, dal Tirol, da Salzburg, dal Tirol dal sid e dal Trentino ina cunter l'autra sin la plazza da sport a la Ringstrasse a Cuira. Avert vegn il turnier internaziunal da ballape U15 la gievgia, ils 17 da matg, cun in gieu d'amicizia U21 tranter Cuira 97 ed il club da ballape da Son Gagl.

Il final da las duas meglras equipas da ballape da la ARGE ALP ha lieu dumengia, ils 20 da matg 2012, a las 11.30. Per tgi che gudogna l'emprima disciplina da stad da quest onn resulta ina buna posiziun en il classament general a la fin da la stagiun da concurrenza 2011/2012. L'onn 2010/2011 ha il Trentino gudagnà la classificaziun dals pajais. Tut en tut èn 1'737 sportistas e sportists sa participads a las concurrenzas.

La cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan nov pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid e Trient. Presidiada vegn la ARGE ALP mintgamai per in onn d'in da ses commembers. La sedia dal secretariat è a Puntina. Il territori da la ARGE ALP cumpiglia ina surfatscha da 118'504 kilometers quadrat ed è il dachasa da 16 milliuns persunas. Ulteriuras infurmaziuns sut: www.argealp.org e www.argealp-sport.org.


Agiunta:
PDFcarnet da program dal turnier da ballape da la ARGE ALP 2012 a Cuira


Infurmaziuns:
- Beat Tschalèr, uffizi per la scola populara ed il sport dal Grischun, tel. 081 257 27 56
- Urs Zimmermann, coordinatur da l'associaziun grischuna da ballape, tel. 079 353 52 11


Gremi: uffizi per la scola populara ed il sport dal Grischun
Funtauna: rg chanzlia chantunala dal Grischun
Neuer Artikel