Zum Seiteninhalt

Communicaziun da la regenza dals 16 da matg 2012

  • Erste Mitteilung
  • Neuen Beitrag einfügen
En sia ultima sesida ha la regenza grischuna tractà differentas fatschentas da vischnancas e da regiuns.

Da vischnancas e da regiuns 
  • Morissen: A la vischnanca da Morissen vegn concedida ina contribuziun maximala da 110'880 francs per la segunda etappa da la sanaziun e da l'engrondiment dal provediment d'aua. Quai cun resalva d'ina contribuziun federala. 
  • Medel (Lucmagn): En il rom da la quarta etappa dal project general da la corporaziun d'aua Medel (Lucmagn) vegn garantida a la vischnanca da Medel (Lucmagn) ina contribuziun da maximalmain 154'440 francs per renovar e per engrondir il provediment d'aua da Fuorns. Premessa vegn la subvenziun correspundenta da la confederaziun. 
  • Almen: La revisiun totala da la planisaziun locala da la vischnanca dad Almen dals 7 da december 2011 vegn approvada cun correcturas ed instrucziuns. La revisiun totala cuntegna ina nova lescha da construcziun sco er in repassament dals plans da zonas e dals plans generals da furmaziun sco er dals plans generals d'avertura per il traffic, per il provediment e per la dismessa. 
  • Haldenstein: La revisiun parziala da la planisaziun locala Oldis, concludida da la vischnanca da Haldenstein ils 25 da november 2011, vegn approvada. La revisiun parziala cuntegna l'adattaziun dals plans d'utilisaziun e l'examinaziun ecologica per l'amplificaziun da l'explotaziun da gera Oldis sin ina surfatscha da var 7,3 hectaras cun in volumen d'explotaziun planisà da circa 1'200'000 meters cubic. L'explotaziun ha lieu en trais etappas durant 30 onns. Per la surfatscha che vegn duvrada per l'explotaziun da gera vegn prestada ina cumpensaziun da medema surfatscha tras mesiras da revalitaziun. 
  • Scuol: La revisiun parziala da la planisaziun locala, concludida da la vischnanca da Scuol ils 27 da november 2011, vegn approvada. En in plan da zonas 1:10'000 "Zonas da paus per la selvaschina" èn vegnidas determinadas novas zonas da paus per la selvaschina sin l'entir territori communal da Scuol. 
  • Mustér e Sumvitg: La revisiun parziala da la planisaziun locala, concludida mintgamai da las duas vischnancas da Mustér e da Sumvitg ils 29 da schaner 2012 respectivamain ils 5 da mars 2012, vegn approvada. La revisiun parziala cuntegna determinaziuns en ils plans d'utilisaziun en il territori da Barcuns en connex cun l'engrondiment da l'ovra idraulica Russein. 
  • Mut: Als custs per renovar la via chantunala da colliaziun cun la via dal Meir, via da Mut (kilometer 6,38 fin 7,45), vegn garantida ina contribuziun chantunala da 218'889 francs. Quai cun resalva d'ina contribuziun federala. 
  • Regiun Engiadina bassa: Il plan directiv cun las mesiras immediatas 2011 – vias per velos e per velos da muntogna, ch'è vegnì concludì da la corporaziun regiunala Pro Engiadina bassa ils 4 d'october 2011, vegn approvà.

Contribuziuns chantunalas a differentas instituziuns
  • Cuminanza d'interess da saut da la Svizra orientala: A la cuminanza d'interess da saut da la Svizra orientala vegn pajada ils onns 2013, 2014, 2015 e 2016 ina contribuziun totala da maximalmain 60'000 francs per il project "Tanzplan Ost". Quai cun la resalva ch'il cussegl grond concedia mintga onn ils credits.

Projects da vias
La regenza ha approvà 2'040'000 francs per lavurs da construcziun sin ils suandants trajects:
- via naziunala A28: lavurs da cuvrida, sviament da Saas e punt dal Trockenbach
- via sursilvana: lavurs da cuvrida, sviament da Tavanasa


Gremi: regenza
Funtauna: rg chanzlia chantunala dal Grischun
Neuer Artikel