Ils chantuns da la regiun dal Gottard (Uri, Grischun, Tessin e Vallais) conferman lur intenziun da sa preschentar cuminaivlamain a l'expo 2015 a Milaun e da sa partir in sectur en il pavigliun da la Svizra  

16.05.2012
L'expo 2015 è in'occurrenza impurtanta che ha lieu directamain davant las portas da la Svizra e che sveglia perquai spezialmain l'interess dals chantuns che sa chattan geograficamain en vischinanza da Milaun, pia dals quatter chantuns da la regiun dal Gottard. Dapi in pèr mais s'occupan represchentants da las regenzas chantunalas da la dumonda, co ch'ina visibilitad uschè gronda sco pussaivel e co ch'in effect uschè persistent sco pussaivel per ils quatter chantuns possian vegnir garantids durant l'exposiziun. En mintga cas datti in consens concernent la proposta da duvrar cuminaivlamain in sectur da 150 m2 en il pavigliun svizzer. Cun l'equipament e cun il sboz creativ duai vegnir incumbensà quel biro d'architectura e da design, al qual Preschientscha Svizra aveva gia confidà il project per il pavigliun svizzer. Preschientscha Svizra, in'unitad dal departament federal d'affars exteriurs (DFAE) e responsabel dapi l'onn 2001 per la participaziun uffiziala da la Svizra ad exposiziuns mundialas, surpiglia la direcziun dal project per il pavigliun svizzer.

L'installaziun e la direcziun dals secturs cuminaivels suttastattan als quatter chantuns che collavuran stretgamain cun Preschientscha Svizra. En quest connex vulessan nus trair endament ch'ils dus delegads chantunals per l'expo 2015 èn er represchentads en la giunta directiva, numnadamain ils dus anteriurs cussegliers guvernativs advocat Luigi Pedrazzini per il chantun Tessin ed advocat Claudio Lardi per il chantun Grischun.

Ils chantuns da la regiun dal Gottard speran che la cumparsa a Milaun n'haja betg mo effects directs, mabain inizieschia er in svilup positiv a lunga vista. La preschientscha da la regiun dal Gottard a Milaun duai avrir ina fanestra impurtanta sin plaun internaziunal e bittar la glisch en spezial sin las regiuns da l'intschess dal traffic dal nord al sid e da las novas transversalas tras las Alps.

Ils custs per la cumparsa vegnan ils chantuns a repartir tranter els tenor ina clav che vegn fixada cuminaivlamain.

Ils delegads ed ils represchentants dals quatter chantuns èn d'accord davart il punct che l'expo 2015 porscha ina schanza impurtanta da preschentar pli detagliadamain las regiuns svizras che cunfineschan cun l'Italia e da promover lur grad d'enconuschientscha.

En quest connex vegni spetgà tranter auter ch'ils resultats dal giudicament da las consequenzas economicas – in studi che l'universitad da la Svizra taliana ha fatg davart la cumparsa a l'exposiziun da Milaun per incumbensa da Preschientscha Svizra – sa verifitgeschian.


Per ulteriuras infurmaziuns As drizzai p.pl. a:
- Luigi Pedrazzini, delegà per l'expo 2015 per il chantun Tessin, tel. 079 320 00 08
- Claudio Lardi, delegà per l'expo 2015 per il chantun Grischun, tel. 079 610 44 55 

Internet:
https://www.dfae.admin.ch