Cuntegn da la pagina

Il zercladur salva il cussegl grond sia sessiun extra muros a Samignun

  • Erste Mitteilung
  • Neuen Beitrag einfügen
Dals 11 fin ils 14 da zercladur 2012 salva il cussegl grond sia sessiun extra muros a Samignun. Questa sessiun en la regiun vegn actualmain preparada cun plaina forza. La sessiun stat sut il motto "collavuraziun transcunfinala".

Sin proposta da la conferenza da las presidentas e dals presidents ha il parlament tschernì l'avrigl da l'onn passà Samignun sco lieu da sessiun. En il passà han gia gì lieu sessiuns extra muros a Mustér, a Tavau, a Landquart ed a Puschlav.
La sessiun extra muros a Samignun dura quatter dis, da glindesdi, ils 11 da zercladur, fin gievgia, ils 14 da zercladur. Il cussegl sa raduna en la chasa da scola da Samignun-Compatsch, nua che la halla da gimnastica vegn transfurmada en ina sala da cussegl. Il secretariat dal cussegl grond da la chanzlia chantunala è vegnì incumbensà d'organisar questa sessiun. Actualmain vegnan las preparaziuns fatgas cun plaina forza. Per il program accumpagnant spezial durant la sessiun extra muros e per l'infrastructura tecnica necessaria al lieu procura la vischnanca ospitanta.

Program accumpagnant varià
Las deputadas ed ils deputads duain survegnir a Samignun la pussaivladad d'emprender ad enconuscher pli bain la regiun e la populaziun. Il motto da la sessiun extra muros sa cloma "collavuraziun transcunfinala". Latiers ha la vischnanca da Samignun arranschà in program accumpagnant cultural, sportiv e culinaric interessant e varià. Il viadi da las deputadas e dals deputads a Samignun duai gia esser spezial. Igl è previs che las deputadas ed ils deputads vegnian beneventads glindesdi, ils 11 da zercladur, a las 11.30, uffizialmain a Scuol da l'organisaziun turistica Engiadina Scuol Samignun. Suenter in curt program accumpagnant e suenter l'alimentaziun vegnan las parlamentarias chantunalas ed ils parlamentaris chantunals manads cun l'auto da posta sin la via veglia da Samignun a Compatsch, nua ch'i cumenza, a las 14.30, la sessiun cun il pled d'avertura dal president dal cussegl grond.

Mardi suentermezdi, ils 12 da zercladur, a las 14.00, vegn l'organisaziun turistica Engiadina Scuol Samignun a sa preschentar al parlament en la sala da festa. Mesemna vers saira è previs in program accumpagnant uffizial per las parlamentarias e per ils parlamentaris. Suenter in aperitiv da bainvegni e suenter ina tschaina cun giasts envidads sa splega in program da divertiment per tut la populaziun da la regiun.

Las organisaturas ed ils organisaturs porschan ultra da quai a las parlamentarias ed als parlamentaris in "sightjogging" facultativ, e quai mardi e mesemna la damaun marvegl avant las sesidas. Tenor in carnet separà d'infurmaziuns e da program stattan plinavant a disposiziun a las commembras ed als commembers dal cussegl grond numerusas pussaivladads per passentar il temp liber.

Glista da tractandas bain chargiada
A la sessiun ordaifer Cuira na spetgan a las deputadas ed als deputads betg mo daletgs culturals, sportivs e culinarics, mabain er ina glista da tractandas bain chargiada. Tranter auter èn la revisiun parziala da la constituziun chantunala (refurma territoriala) e la revisiun totala da la lescha davart il guaud sin il program. Las ulteriuras fatschentas tractandadas èn: il quint dal chantun 2011, l'engrondiment architectonic dal museum d'art dal Grischun, la missiva davart la structura da las gruppas da products e davart ils effects per ils onns 2013 fin 2016 sco er las elecziuns da las autoritads giudizialas chantunalas per la proxima perioda d'uffizi. Sco usità èn las sesidas dal parlament publicas e las persunas interessadas èn cordialmain envidadas da las persequitar davent d'ina tribuna.

Las sessiuns dal cussegl grond ch'èn vegnidas salvadas enfin ussa extra muros han gì lieu duas giadas en ina regiun tudestga, ina giada en ina regiun rumantscha e l'ultima giada en ina regiun taliana. L'onn 2006 èn las chombras federalas sa radunadas en Surselva e pia er en ina regiun rumantscha. Quest fatg e la candidatura persvadenta han intimà la conferenza da las presidentas e dals presidents da proponer al cussegl grond da realisar sia sessiun extra muros 2012 a Samignun. Ils custs supplementars per realisar la sessiun extra muros sa chattan en il rom dal preventiv concludì dal cussegl grond e vegnan stimads a ca. 140 000 francs.


Agiuntas:
- PDF1carnet da program per la sessiun extra muros a Samignun
- PDF2invitaziun (cun talun d'annunzia) per l'occurrenza festiva ils 13 da zercladur 2012


Infurmaziuns:
- president dal cussegl grond Ueli Bleiker, tel. 081 650 11 36
- Hans Kleinstein, president communal da Samignun, tel. 079 610 30 09
- Domenic Gross, manader dal secretariat dal cussegl grond da la chanzlia chantunala, tel. 081 257 22 32


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel