Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha tschernì Walter Schlegel da 50 onns sco nov cumandant da polizia. El vegn a surpigliar il commando da la polizia chantunala dal Grischun il 1. da fanadur 2012.

Walter Schlegel, domicilià a Trimmis, è vegnì elegì da la regenza sco nov cumandant da la polizia chantunala dal Grischun. Schlegel da l'annada 1962 ha s'acquistà la patenta d'advocat dal Grischun suenter il studi da giurisprudenza a Turitg. Dal 1992 fin il 1999 ha Schlegel lavurà sco vicemanader da l'uffizi da polizia dal chantun Grischun. Suenter è el stà occupà sco secretari dal departament da l'intern e da l'economia publica dal Grischun. Il 1. da schaner 2007 ha la regenza tschernì Schlegel sco manader da l'uffizi per l'execuziun giudiziala dal Grischun. En sia funcziun sco manader dal post da stab per la giunta dal WEF da la regenza grischuna ha el collavurà stretgamain cun la polizia chantunala dapi l'onn 2001. En l'armada svizra ha Schlegel il grad d'in colonel.

Schlegel daventa successur da Beat Eberle ch'è vegnì tschernì dal cussegl federal sco nov schef per la segirezza militara. El vegn a surpigliar sia nova funcziun il 1. da fanadur 2012. Il cumandant da polizia ha la responsabladad da manar la polizia chantunala grischuna cun sias var 450 collavuraturas e collavuraturs.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01


Fotografia agiuntada:
Walter Schlegel
Walter Schlegel, il nov cumandant da la polizia chantunala dal Grischun


Gremi: regenza
Funtauna: rg chanzlia chantunala dal Grischun
Neuer Artikel