La regenza grischuna ha prendì enconuschientscha dal rapport annual 2011 concernent l'execuziun da la lescha davart las prestaziuns supplementaras. Il rapport mussa in ulteriur augment da las prestaziuns supplementaras a la AVS ed a la AI. Plinavant ha la regenza approvà differentas contribuziuns e differents projects da vias.

Las prestaziuns supplementaras da l'onn 2011 èn s'augmentadas ulteriuramain
Er l'onn 2011 èn vegnidas pajadas dapli prestaziuns supplementaras en il Grischun. Quai mussa il rapport annual concernent l'execuziun da la lescha chantunala davart las prestaziuns supplementaras, dal qual la regenza ha prendì enconuschientscha. Il quint da gestiun 2011 preschenta custs nets da circa 94 573 000 francs. En cumparegliaziun cun l'onn precedent èn ils custs nets s'augmentads per circa 6 245 000 francs, respectivamain per 7,1 pertschient. L'entrada en vigur dal nov urden per la reordinaziun da la finanziaziun da la tgira per il 1. da schaner 2011 è stada il motiv principal ch'ils custs èn s'augmentads fermamain. La contribuziun federala a las prestaziuns supplementaras ha importà circa 24 857 000 francs, respectivamain 26,28 pertschient dals custs totals.
Il dumber dals cas activs da las prestaziuns supplementaras è s'augmentà per 1,8 pertschient en cumparegliaziun cun l'onn precedent. Il ferm augment dal dumber da persunas che retiran prestaziuns è bain sa mitigià in pau durant l'onn da gestiun, ma durant ils ultims tschintg onns è il dumber dals cas activs da las prestaziuns supplementaras s'augmentà per 19,0 pertschient. Per las prestaziuns supplementaras a las rentas da la AVS ha l'augment importà durant questa perioda 19,2 pertschient ed è stà in pau pli aut che quel da las prestaziuns supplementaras a las rentas da la AI cun 18,7 pertschient.
Las prestaziuns supplementaras a la AVS ed a la AI gidan là, nua che las rentas da la AVS e da la AI ensemen cun las ulteriuras entradas e cun l'ulteriura facultad da las persunas assicuradas na tanschan betg per cuvrir ils custs minimals da la vita. Igl exista in dretg giuridic da survegnir prestaziuns supplementaras. Ellas n'èn betg prestaziuns d'assistenza u agid social.

Revisiun parziala da l'ordinaziun davart la surveglianza da las fundaziuns
La regenza ha adattà l'ordinaziun davart la surveglianza da las fundaziuns. Las taxas annualas da surveglianza vegnan fixadas sco enfin ussa sin basa da la facultad brutta da la fundaziun. Bains culturals ed immobiglias che appartegnan a quella, che na genereschan betg grondas entradas e che servan directamain a l'intent da la fundaziun, na vegnan en il futur betg pli resguardads tar la fixaziun da las taxas da surveglianza. Da las taxas da surveglianza pli bassas vegnan a profitar en spezial museums che ston savens er mantegnair immobiglias istoricas che stattan per part sut la tgira da monuments, ma er fundaziuns che han l'intent da mantegnair e da publitgar ovras d'art.

La nova ordinaziun federala davart la planisaziun dal territori vegn beneventada
En sia resposta da consultaziun beneventa la regenza grischuna la revisiun parziala da l'ordinaziun federala davart la planisaziun dal territori. Per l'ina cuntegna la revisiun il fatg ch'ils edifizis d'abitar tenor il dretg vegl survegnan – tenor la nova lescha davart la planisaziun dal territori – il medem status sin il plaun da l'ordinaziun. Tenor il dretg vegl stuevi per part vegnir sclerì en il rom da la procedura per la permissiun da construcziun, sch'in edifizi d'abitar ordaifer las zonas da construcziun aveva intents agriculs u betg agriculs avant l'onn 1972. Tals scleriments n'èn betg pli necessaris. Per l'autra duain las prescripziuns vegnir schluccadas en quel senn, che l'energia che vegn producida en ils stgaudaments da laina dals manaschis agriculs ch'èn situads ordaifer la zona da construcziun, possia vegnir transportada sur distanzas pli lungas entaifer las zonas da construcziun. La regenza grischuna beneventa questa flexibilisaziun, perquai che la producziun d'energia or da materias primas regenerablas indigenas cun agid d'in indriz da chalur decentral è en l'interess da la publicitad.


Da vischnancas e da regiuns

• Churwalden: La revisiun parziala da la lescha da construcziun sco er il plan da zonas e plan general da furmaziun 1:1000, revisiun parziala "Plazza da saut / setgentaria da charn" che la vischnanca da Churwalden ha concludì ils 27 d'october 2011 vegnan approvads. Cun quests meds da planisaziun ch'èn cuntegnids en la revisiun parziala da la planisaziun locala vegni creà pussaivladads da svilup per il center da manaschi da la setgentaria da charn Churwalden SA. Grondas parts da la revisiun da la planisaziun locala dals 27 d'october 2011 n'ha la regenza betg anc decidì. 
• Valendau: Il project "Sanaziun dal passadi sur l'aual da Carrera" che l'uffizi da guaud e privels da la natira ha inoltrà per incumbensa da la vischnanca da Valendau vegn approvà. Als custs vegn garantida ina contribuziun da maximalmain 261 300 francs. 
• Morissen / Cumbel: ll reglament per las zonas da protecziun ed il plan da las zonas da protecziun a las scalas 1:2000 ed 1:1000 per las funtaunas dal provediment d'aua public da la vischnanca da Cumbel, ch'èn vegnids relaschads da la suprastanza communala da Morissen ils 11 da schaner 2012, vegnan approvads. Las funtaunas e las zonas da protecziun sa chattan cumplainamain sin il territori communal da Morissen.

 
Contribuziuns chantunalas a differentas instituziuns sco er contribuziuns ad occurrenzas culturalas

• Fundaziun SvizraMobila: Per la fasa da svilup SvizraMobila 2013 – 2015 vegn garantida a la fundaziun SvizraMobila ina contribuziun chantunala da totalmain 177 000 francs. Resalvada resta l'approvaziun dal credit tras il cussegl grond. SvizraMobila è ina rait naziunala per il traffic betg motorisà e coordinescha ina rait da rutas signalisada uffizialmain ed en moda unitara per il temp liber e per il turissem (per exempel viandar, velo, velo da muntogna, patins cun rodas e canu). 
• Festival cultural Origen 2012: Al festival cultural Origen 2012 cun circa 150 occurrenzas fin mez avust, en numerus lieus en il chantun, vegn concedida ina garanzia da deficit da maximalmain 160 000 francs. 
• Festival da jazz San Murezzan 2012: Al festival da jazz San Murezzan 2012 (13 da fanadur fin 12 d'avust) vegn concedida ina garanzia da deficit da maximalmain 75 000 francs.

Projects da vias
La regenza ha approvà 14 480 000 francs per lavurs da construcziun sin ils suandants trajects:
- via dal Meir: lavurs d'impressari per segirar ina bova
- via dal Güglia: lavurs d'impressari per engrondir la storta Gross
- via dal Güglia: projectaziun dal sviament da Silvaplauna / tunnel da Silvaplauna
- via d'Engiadina: lavurs d'impressari e da cuvrida per la correcziun da la via da Schlarigna – Punt Muragl

Plinavant ha la regenza approvà il project d'exposiziun per la correcziun da la via Fatscheler, traject spartavias via dal Scanvetg – via dal Oberdorf. Il project da via sin il territori communal da St. Peter – Pagig cuntegna il schlargiament da la via da la vart da la val.


Gremi: regenza
Funtauna: rg chanzlia chantunala dal Grischun