Cuntegn da la pagina

Midada en la direcziun da la EURES a la dieta annuala a Tavau

  • Erste Mitteilung
  • Neuen Beitrag einfügen

Premiera a Tavau: Per l'emprima giada salva l'iniziativa transcunfinala dal martgà da lavur EURES BODENSEE sia dieta annuala oz e damaun en il Grischun. En il center stat – ultra da referats actuals – la midada a la testa dal partenadi transcunfinal. Peter Kuratli (Son Gagl) remplazza Johannes Rutz sco president.

A Tavau sa radunan gievgia, ils 14, e venderdi, ils 15 da zercladur 2012 var 60 represchentantas e represchentants principals da las administraziuns dal martgà da lavur, da centers da job e dals partenaris socials (economia e sindicat) da la Svizra, da la Germania, da l'Austria e dal Liechtenstein a la dieta tradiziunala da la EURES BODENSEE. Da questa iniziativa fan part 25 organisaziuns partenarias, tranter quellas er l'uffizi per industria, mastergn e lavur dal Grischun. La finamira ed il giavisch cuminaivel èn da promover la mobilitad professiunala en il territori dal Lai da Constanza cun infurmaziuns praticas, cun cussegliaziuns professiunalas e cun ina intermediaziun da plazzas.

Revista sin nov onns prosperaivels
La dieta cumenza oz a las 14.00 en il center da congress a Tavau. Beneventads vegnan las expertas ed ils experts dal martgà da lavur da Paul Schwendener, manader da l'uffizi per industria, mastergn e lavur dal Grischun. Alura dat il president cedent dad EURES BODENSEE, Johannes Rutz, in sguard enavos sin la lavur dals ultims nov onns. La EURES BODENSEE ha pudì metter en moviment ed ha cuntanschì l'ina u l'autra chaussa. Realisads èn vegnids:

  • broschuras per lavurantas cunfinarias e per lavurants cunfinaris sco er per lur patrunas e per lur patruns 
  • regularmain dis d'infurmaziun 
  • ina "bartga dal martgà da lavur" 
  • bursas da jobs sco "L'enviern en la naiv, la stad al lai" 
  • dietas d'expertas e d'experts e studis davart la vita e davart la lavur en ils quatter pajais 
  • ina rait da cussegliadras e da cussegliaders dad EURES scolads spezialmain.

Peter Kuratli vegn a guidar la EURES BODENSEE vers l'avegnir. A la dieta annuala surpiglia el da Johannes Rutz l'uffizi dal president. Ultra da quai vegn discutà a la dieta l'avegnir dal partenadi transcunfinal e referì davart "Glisch e sumbriva en il Silicon Valley – enconuschientschas per la Val dal Rain" (prof. Josef Walker, Cuira) e davart il "Chapital social sco factur a favur dal lieu e dal futur" (Kriemhild Büchel-Kapeller, Vorarlberg). Damaun stat sin il program ina excursiun tar l'institut per la perscrutaziun da naiv e lavinas respectivamain tar la AO Foundation.


Infurmaziuns:
Jörg Guyan, substitut dal manader da l'uffizi per industria, mastergn e lavur, tel. 079 273 45 44


Gremi: Uffizi per industria, mastergn e lavur
Funtauna rg: Uffizi per industria, mastergn e lavur

Neuer Artikel