Zum Seiteninhalt

Nova basa da mantegniment Lumnezia da l'uffizi districtual da construcziun bassa Glion

  • Erste Mitteilung
  • Neuen Beitrag einfügen
Mesemna, ils 27 da zercladur 2012, vegn averta a Degen uffizialmain la nova basa da mantegniment Lumnezia da l'uffizi da construcziun bassa, district 6, Glion. Entaifer in onn èn las localitads insuffizientas vegnidas remplazzadas tras in nov stabiliment funcziunal.

Il district 6 da l'uffizi da construcziun bassa a Glion tgira ina rait da vias da 284 kilometers. El cumpiglia tut la Surselva da La Punt fin al pass da l'Alpsu resp. al pass dal Lucmagn inclusiv tut las vals lateralas. Cun questa rait da vias vasta e pretensiusa e cun ina surfatscha da 1383 kilometers quadrat è il district 6 da Glion il segund grond district dal chantun. Da la basa da Lumnezia anora garanteschan totalmain tschintg collavuraturs il mantegniment architectonic e funcziunal da la via da la Lumnezia da Glion fin a Vrin sco er da las vias lateralas appartegnentas.
Las localitads existentas na pudevan lunschor betg pli ademplir las pretensiuns che vegnan fatgas ozendi envers in mantegniment modern da las vias. Il fatg che las localitads sa chattavan en differents stabiliments difficultava il manaschi dal mantegniment da la rait da vias. Remisas per vehichels mancavan per gronda part e stuevan vegnir prendidas en locaziun en differents lieus. Il material ed ils apparats vegnivan deponids en sustas provisoricas. Al persunal stevan a disposiziun locals da segiurn e gardarobas d'in standard fitg modest.

Nova basa per il servetsch quotidian
En la fracziun da Vattiz da la vischnanca da Degen ha pudì vegnir cumprà l'onn 2010 in bain immobigliar adattà per la construcziun d'ina nova basa. Sa basond sin il concept da gestiun e sin il program da spazi da l'uffizi da construcziun bassa è vegnì planisà in edifizi simpel ed adequat en lain.
La realisaziun ha durà in onn. Sut in sulet tetg èn ussa unids ina halla per parcar vehichels, localitads da deposit sco er locals da segiurn e gardarobas per ils collavuraturs. Il stabiliment sa distingua tras ina moda da construcziun funcziunala e persistenta e tras furmas cleras. El correspunda a las pretensiuns che vegnan fatgas ozendi ad ina basa moderna e sustegna ils collavuraturs en lur servetsch quotidian sin via.
La basa è accessibla a la publicitad interessada sonda, ils 30 da zercladur 2012, a chaschun d'in di da las portas avertas.


Remartga:
Las collavuraturas ed ils collavuraturs da las medias èn envidads a la festa d'avertura che ha lieu mesemna, ils 27 da zercladur 2012, a las 16.00, a la quala vegn er ad esser preschent cusseglier guvernativ dr. Mario Cavigelli. La festa ha lieu en la nova basa da mantegniment Lumnezia da l'uffizi da construcziun bassa district 6, Vattiz, a la via da la Lumnezia. (PDFLink al plan d'access).


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31
- Reto Knuchel, schef dal mantegniment da vias, uffizi da construcziun bassa, tel. 081 257 37 35


Gremi: uffizi da construcziun auta dal Grischun
Funtauna: rg uffizi da construcziun auta dal Grischun
Neuer Artikel