Cuntegn da la pagina

Communicaziun da la regenza dals 28 da zercladur 2012

  • Erste Mitteilung
  • Neuen Beitrag einfügen

La regenza grischuna ha determinà da nov las cundiziuns per ina reducziun da la taglia per autos che chaschunan paucas emissiuns. Plinavant ha ella fixà il termin per la votaziun davart la refurma dal territori ed ha tractà fatschentas da las vischnancas.

Adattà la reducziun da la taglia per autos cun paucas emissiuns
Possessuras e possessurs d'autos da persunas che chaschunan paucas emissiuns survegnan – tenor il dretg vertent – ina reducziun da la taglia da traffic. Ina reducziun da 60 pertschient survegn ins oz per vehichels a motor levs cun in'emissiun da CO2 da maximalmain 140 g/km ed ina reducziun dad 80 pertschient per vehichels a motor levs cun in'emissiun da CO2 da maximalmain 120 g/km. Sco fixà en l'ordinaziun correspundenta reducescha la regenza mintga dus onns las limitas per l'emissiun da CO2, e quai sin basa dals progress tar il svilup d'autos da persunas cun paucas emissiuns. Per il 1. da schaner 2013 vala da nov ina reducziun da la taglia da traffic da 60 pertschient per vehichels a motor levs cun in'emissiun da CO2 da maximalmain 130 g/km ed ina reducziun dad 80 pertschient per vehichels a motor levs cun in'emissiun da CO2 da maximalmain 110 g/km. Ina revisiun parziala da l'ordinaziun tar la lescha introductiva tar la lescha federala davart il traffic sin via entra en vigur cun questa data.

La votaziun davart la refurma dal territori ha lieu ils 23 da settember 2012
La dumengia dals 23 da settember 2012 vegni votà davart la revisiun parziala da la constituziun chantunala (refurma dal territori).
Plinavant ha la regenza grischuna prendì enconuschientscha dal fatg ch'ils suandants projects federals vegnan suttamess il medem di a la votaziun dal pievel:
- conclus federal dals 15 da mars 2012 davart la promoziun da la furmaziun musicala da la giuventetgna (cuntraproposta a l'iniziativa dal pievel "giuventetgna + musica")
- iniziativa dal pievel dals 23 da schaner 2009 "Segirezza d'abitar per persunas pensiunadas"
- iniziativa dal pievel dals 18 da matg 2010 "Protecziun cunter il fimar passiv"


Da vischnancas e da regiuns

  • San Vittore: La revisiun parziala da la planisaziun locala, concludida da la vischnanca da San Vittore ils 20 da mars 2012, vegn approvada. La revisiun parziala cumpiglia l'attribuziun d'ina stretga strivla da terren a la zona d'industria. 
  • Churwalden: Il plan da zonas 1:1 000 "Revisiun parziala parcella nr. 20 077", concludì da la vischnanca da Churwalden ils 27 d'october 2011 en il rom d'ina revisiun parziala da la planisaziun locala, vegn approvà. 
  • Schlarigna: Il project "Via da maschinas Val S-chüra" da la vischnanca da Schlarigna vegn approvà. Tras la construcziun da la via da maschinas "Val S-chüra" survegn ina surfatscha da guaud da 65 hectaras in meglier access. 
  • Farera: Il project "Via da maschinas Lavenzug" che l'uffizi da guaud e privels da la natira ha inoltrà per incumbensa da la vischnanca da Farera vegn approvà. I vegn garantida ina contribuziun da maximalmain 36 180 francs. Il project cuntegna in meglier access dals guauds en il territori da Lavenzug.

 
Projects da vias
La regenza ha approvà 1 355 000 francs per lavurs da construcziun sin il suandant traject:
- via dal Landwasser: implants a tensiun media, tunnel dal Landwasser


Gremi: regenza
Funtauna: rg chanzlia chantunala dal Grischun

Neuer Artikel