Cuntegn da la pagina

Communicaziun da la regenza dals 12 da fanadur 2012

  • Erste Mitteilung
  • Neuen Beitrag einfügen

A chaschun da sia ultima sesida ha la regenza grischuna prendì posiziun davart diversas ordinaziuns e tractà differentas fatschentas da vischnancas e da regiuns.

La regenza beneventa la revisiun parziala da l'ordinaziun davart la furmaziun professiunala
En sia posiziun a la confederaziun sustegna la regenza grischuna la revisiun parziala da l'ordinaziun davart la furmaziun professiunala. Cun l'adattaziun vul la confederaziun augmentar sias contribuziuns per la realisaziun dals examens federals dad actualmain 25 sin 60 pertschient, en cas d'examens che chaschunan spezialmain blers custs fin sin 80 pertschient. Uschia renconuscha la confederaziun la promoziun da la furmaziun professiunala superiura sco finamira centrala. La regenza grischuna sustegna l'adattaziun, constatescha però en sia posiziun ch'i na saja betg en emprima lingia necessari d'adattar la finanziaziun dals examens federalas per rinforzar la furmaziun professiunala superiura, mabain dad armonisar oravant tut la finanziaziun dals curs preparatorics.

La regenza grischuna pretenda proceduras efficazias per reducir las emissiuns da CO2
La lescha da CO2 ch'è vegnida deliberada dal parlament federal l'onn 2011 vul reducir ils gas cun effect da serra emess en Svizra fin l'onn 2020 per almain 20 pertschient envers l'onn 1990. L'ordinaziun da CO2 dal cussegl federal ch'è ussa avant maun concretisescha la concepziun dals singuls instruments. La regenza resta tar sia posiziun ch'ils chantuns n'avevan – cun excepziun dal program d'edifizis – enfin ussa naginas incumbensas d'execuziun en il sectur da la lescha da CO2. Il sboz ch'è avant maun attribuescha als chantuns incumbensas tar la rapportaziun e tar ils fatgs d'annunzia ch'èn per part novs e che chaschunan lavur supplementara considerabla. La regenza grischuna pretenda per quai ina indemnisaziun cumplaina da la confederaziun. Plinavant pretenda ella en sia posiziun proceduras uschè efficazias sco pussaivel per limitar la lavur administrativa.

La regenza beneventa la revisiun parziala en il sectur d'asil
La regenza grischuna sustegna las revisiuns parzialas da l'ordinaziun 2 davart l'asil concernent las dumondas da finanziaziun, da l'ordinaziun davart l'integraziun da persunas estras sco er da l'ordinaziun davart l'execuziun da la spedida e da l'expulsiun da persunas estras. La finamira da las revisiuns parzialas è tranter auter quella d'integrar meglier en il martgà da lavur persunas che retiran agid social, dad optimar ils instruments da l'agid per il return e da promover la prontezza da persunas en arrest administrativ da bandunar la Svizra. La regenza grischuna beneventa oravant tut il nov sistem da finanziaziun che duai vegnir francà en questas trais ordinaziuns e che duai eliminar fauss impuls. Il chantun Grischun ha gia rendì attent diversas giadas a las mancanzas dal sistem da finanziaziun vertent.


Da vischnancas e da regiuns

  • Via sursilvana da la vart dretga dal Rain: Per il traject da la punt da la chavorgia da Versomi (kilometer 6,371 – 6,448) da la via chantunala da colliaziun vegn auzà il pais maximal permess dad actualmain 13 tonnas sin 32 tonnas. 
  • Sumvitg: La revisiun parziala da la constituziun communala da la vischnanca da Sumvitg dals 17 da zercladur 2012 vegn approvada.


Projects da vias
A chaschun da sia ultima sesida ha la regenza approvà ils suandants projects per correcziuns da vias:
- via dal Scanvetg: traject Nasstobel fin Brandacker (kilometer 2,41 – 2,70)
- via da Samignun: traject Laubtal fin Spissermühle (kilometer 8,34 – 8,60)
- via d'Engiadina: traject da l'access da Cinuos-chel fin a Brail vest (kilometer 29,31 – 30,79)
- via da Schuders: traject da l'access da Montagna fin al spartavias da Pusserein (kilometer 1,55 – 2,74)

Plinavant ha la regenza approvà totalmain 4 112 000 francs per lavurs da construcziun sin ils suandants trajects:
- via da la Lumnezia: lavurs d'impressari, Glion – Vrin
- via da Stels: lavurs d'impressari e da cuvrida, Schiers – Fajauna


Gremi: regenza
Funtauna: rg chanzlia chantunala dal Grischun

Neuer Artikel